د تاجکستان ولسمشر: د افغانستان ناوړه وضعيت سيمې ته ګواښ دی
ښاغلي رحمان دا څرګندونې پرون پنجشنبه په قرغیزستان کې یوې غونډې ته وکړې او وې ویل، طالبانو تر اوسه د نړیوالې ټولنې او افغانانو باور نه دی ترلاسه کړی.
د تاجکستان ولسمشر یو ځل بیا وویل چې د افغانستان وضعیت ممکن پر منځنۍ اسیا منفي اغېز وکړي.
امام علي رحمان د پنجشنبې په ورځ په قرغیزستان کې د منځنۍ اسیا د مشرانو څلورمې مشورتي غونډې ته وویل، افغانستان کې وضعیت د لا ترینګلتیا خواته روان دی.
دا چې ښاغلي رحمان د افغانستان په اړه نور څه ویلي، د ازادي راډيو د تاجکستان څانګې خبریال کیومرث عطا یې په اړه وایي: "د قرغیزستان په غونډه کې ښاغلي امام علي رحمان د طالبانو پر حکومت نیوکه وکړه چې د نژدې کال په تېرېدو نه دی توانیدلی د نړیوالې ټولنې او د افغانانو باور لاسته راوړي. رحمان وویل، طالبانو د خپلو ژمنو خلاف داسې حکومت نه دی جوړ کړی چې ټول فکرونه او قومونه په کې ځان وګوري، هغه وړاندوېنه کړې چې د افغانستان وضعیت لا ترینګلی کېږي او دا نه یوازې پر منځنۍ اسیا بلکې د ایروایشیا پر هېوادونو هم ناوړه اغیز کوي".
د دغه راپور تر لیکلو پورې طالب ویاندویانو د امام علي رحمان د خبرو په اړه څه ونه ویل، خو مخکې یې ویلي چې حکومت یې پراخ بنسټه او د ولس له ملاتړه برخمن دی.
د تاجکستان ولسمشر د تېر کال په سپتمبر کې د ملګرو ملتونو عمومي اسامبلې ته ویلي و چې هېواد یې له افغانستان سره ګډه پوله لري او هلته د وضعیت په اړه بې تفاوته نه شي پاتې کېدای.
رحمان هغه مهال اندېښنه ښودلې وه چې د طالبانو په واکمنېدو د القاعده شبکې او داعش زرګونه زندانیان ازاد شوي چې په خبره یې سیمې او نړۍ ته یو ګواښ دی.
د تېرې سه شنبې په ورځ ملګرو ملتونو هم په یوه راپور کې وویل چې القاعده شبکه لا هم له طالبانو سره نژدې اړیکې لري.
په دغه راپور کې یادونه شوې وه چې د افغانستان په یو شمېر سیمو کې هم القاعده شبکه فعاله ده، خو د طالبانو ویاند ذبیح الله مجاهد ازادۍ راډیو سره خبرو کې دا راپور رد کړ.
نوموړي وويل: "د دې ډول ادعاوو لپاره هیڅ دلیل او سند نهشته. اسلامي امارت دې ته ژمن دی چې چا ته اجازه نه ورکوي چې د افغانستان له خاورې څخه، د بل کوم هېواد پر ضد ګټه پورته شي او دې ژمنې ته متعهد دی."
د راپورنو له مخې د منځنۍ اسیا هېوادونه افغانستان کې د داعش له حضوره ویره لري.
د طالبانو حکومت د همدې اوونۍ په پيل کې اعلان وکړ چې د کندز په امام صاحب ولسوالۍ کې یې د داعش درې غړي ووژل او پنځه نور یې ونیول.
طالبانو وویل، دغو کسانو د افغانستان له خاورې پر تاجکستان او ازبکستان توغندي ویشتلي وو.
ملګرو ملتونو هم تېره جون میاشت کې وویل چې داعش وسله وال افغانستان کې د طالبانو په وړاندې یو عمده ګواښ دی.