د تاوتریخوالو دوام؛ خلک: د ناوړه چلند له امله طالبانو ته مراجعه نه کوو
دوی وايي، طالب ځواکونه د خلکو پر وړاندې له تاوتریخوالي کار اخلي او دوی غوره نه ګڼي چې د ستونزې پر مهال طالبانو ته مراجعه وکړي.
یوه نجلۍ چې نه غواړي د امنیتي ستونزو له امله يې په راپور کې نوم یاد شي وايي، پر طالب ځواکونو يې بې باوري له نږدې ۱۵ ورځې وړاندې هغه مهال پیل شوه چې د طالبانو یوې ښځینه غړې يې مور ووهله.
هغه وايي، مور يې د کابل ولایت مقام په دروازه کې د طالبانو د یوې ښځینه غړې له خوا هغه مهال ووهل شوه چې مور يې نه غوښتل د طالبانو دغه ښځینه غړې يې تېلیفون وګوري.
دا وايي په دې برخه کې يې د مور غږ هیچا نه دی اورېدلی.
د دغه نجلۍ له لوري ازادي راډيو ته په راستولو انځورونو کې ښکاري چې د یوې پنځوس کلنې مېرمنې چې د نجلۍ په وینا مور يې ده په مخ او لاسونو ټپونه ښکاري.
هغې ازادي راډيو ته وویل: "ویل شوي وو چې هلته له خلکو سره مرسته کېږي، مور مې د مرستې د ترلاسه کولو عریضه وړې وه د طالبانو یوې ښځینه غړې چې د تالاشۍ دنده يې درلوده ورته ویلي وو چې نه شې کولای خپل تلیفون دننه یوسې، مور مې هم هملته ولاړه وه پرته له دې چې د دوی ترمنځ بله خبرې وشي او یا هم خبرې تبادله شي زما مور يې وهلې او ډبولې وه."
دا وايي چې مور يې له ولايته د وتلو پر مهال د طالبانو له والي سره مخامخ شوه او خپله ستونزه يې ورته وويله، خو هغې او په سيمه کې نورو طالبانو د خپلو همکارانو د کړنو په اړه غبرګون ونه ښود او د مور شکايت يې له پامه وه غورځاوه.
هڅه مو وکړه، چې په دې اړه د کابل ولایت د چارواکو نظر هم واخلو، خو بریالي نه شوو.
پر افغانستان د طالبانو له دوهم ځل واکمنۍ راهیسې له خلکو سره د دوی د وسله والو د فیزیکي برخورد کیسه نوې خبره نه ده.
په ټولنیزو رسنیو فیسبوک او ټویټر له خلکو سره د طالب وسله والو د ناوړه چلند لسګونه ویډیو ګانې خپرې شوې دي.
یو بل کس په هرات کې ژوند کوي.
دی هم د امنیتي ستونزو له امله نه غواړي نوم يې خپور شي.
هغه وویل: "زه چې کله د الکترونیکي تذکرې د اخستلو لپاره ولایت ته لاړم، د خلکو ګڼه ګوڼه خورا زیاته وه، طالب وسله والو به د خلکو د خورولو لپاره هوايي ډزې کولې او د لښتو په وسیله يې خلک يې وهل ان مېرمنې هم."
د هرات ولایت دا اوسېدونکی وايي، چې خلک ځکه د طالبانو د دغه ډول ظلمونو پر وړاندې چوپه خوله دي چې دغه ډله د ټوپک په ژبه خلکو ته ځواب ورکوي.
په مخکیني حکومت کې د ستونزې پر مهال د پولیسو او خلکو ترمنځ د اړیکې لپاره عاجلې تېلیفون شمېرې موجودې وې، که څه هم هغه مهال هم ځینې ستونزې وې خو پولیس او ملي اردو توانېدلي وو چې د خلکو ترمنځ خپل باور وساتي.
خلکو هڅه کوله چې د بېلابېلو ستونزو په ځانګړي ډول د ټرافیکي پېښو یا هم د چاودونو پر مهال له امنیتي ځواکونو سره مرسته وکړي خو خلک وايي، چې له دوی سره د طالب وسله والو ناوړه چلند دا همکاري له منځه وړې ده.
د کابل د دشت برچې سیمې یو اوسېدونکی دغلته د وروستي چاودنې او له خلکو سره د طالبانو د چلند په اړه ازادي راډيو ته وویل: "ومې غوښتل چې له پېښې وروسته د پل سوخته سیمې ته لاړ شم، ما هڅه کوله چې د چاودنې په ځای کې له قربانیانو سره مرسته وکړم، خو کله چې د تېلو د پمپ خواته ورسېدم یو کس چې د هماغه ښوونځي شاګرد وو زما خواته راغی ویل يې څه کی، مال غواړم ورشم له قربانیانو سره مرسته وکم، وې ویل نږدې مه ورځه چې خطر لري طالبان ډزې کوي."
د کابل په دشت برچي سیمه کې له چاودونو وروسته له خلکو سره چې غوښتل يې ټپيانو ته وینه ورکړي د طالبانو د ناوړه چلند ویډيو ګانې په ټولنیزو رسنیو خپرې شوې، خو طالبانو د دغه ویډيو ګانو په اړه ویلي چې دوی د ورته یوې بلې احتمالي پېښې د رامنځته کېدو له ویرې خلک نه پرېښودل ګڼه ګوڼه جوړه کړي.
که څه هم د طالبانو د کورنیو چارو وزارت له خلکو سره د طالب وسله والو د ناوړه چلند په اړه څه نه وايي خو وايي هڅه يې کړې چې د ۱۱۹ وړیا شمېر په فعالولو سره د خلکو او امنیتي بنسټونو ترمنځ واټن راکم کړي.
د کورنیو چارو وزارت ویاند عبدلنافع ټکور ازادي راډيو ته وویل: "بلې ۱۱۹ وړیا شمېره څلرویشت ساعته فعاله ده، له شک پرته د خلکو او حکومت ترمنځ باید د اړیکو یو پل موجود وي، موږ د ۱۱۹ وړیا شمېرې ترڅنګ ځینې نورې تېلیفون شمېرې هم فعالې کړي دي، تر څو خلک د ستونزو پر مهال امنیتي سرتېرو ته زنګ ووهي او امنیتي ځواکونه هم عاجل د پېښې سیمې ته ځانونه ورسوي."
له دې وړاندې د طالبانو د حکومت ویاندویانو ویلي وو چې خپلو ځواکونو ته له خلکو سره د سم چلند په اړه روزنه ورکوي خو د اته میاشتو په تېرېدو خلک ادعا کوي چې په دې برخه کې کوم ځانګړی پرمختګ نه دی لیدل شوی.