د کابل ښار یوه امنیتي پوسته کې یو افسر د خپلو همکارانو لهخوا په ډزو ووژل شو
د روانې لمریزې میاشتې په ۲۷مه د کابل د ۱۰مې امنیتي حوزې اړوند په یوه امنیتي پوسته کې یو افسر د خپلو دوو همکارانو لهخوا په ډزو ووژل شو.
د وژل شوي افسر حسین علي خپلوان وايي، که څه هم د حسین علي وژونکي نیول شوي، خو اندېښنه لري چې له سزا پرته بېرته ازاد نهشي.
د وژل شوي افسر د خاله زوی غلام رضا نن دوشنبه «۱۴۰۰ کال د وري ۳۰مه» ازادي راډيو ته وویل: "د جمعې په ورځ حسین علي د اریا ښارګوتي اړوند په امنیتي پوسته کې و چې ماته له حوزې زنګ راغی او وویل شول چې حسین علي ټپي شوی او اېمرجنسي روغتون ته انتقال شوی دی، کله چې زه روغتون ته لاړم حسین علي مړ شوی و، له هغې وروسته چې ما پوښتنه وکړه د ۱۰مې امنیتي حوزې د دوهم ټولي قوماندان د وینا پر بنسټ د نوموړي دوه همکارانو فیصل او سردار خپلو کې لفظي شخړه کړې او ډزې شوي چې په ترڅ کې یوه مرمۍ په حسین علي لګېدلې چې نوموړی لومړی ټپي و او بیا یې روغتون ته په لاره ساه ورکړې."
له ۲۹ کلن حسین علي چې د خپلې کورنۍ یوازنی نفقه راوړونکی و څلور اولادونه، مېرمن او سپین ږیری پلار پاتې شوي.
د نوموړي د خاله زوی غلام رضا وايي، د حسین علي پلار د ناروغۍ په بستر پروت دی او د خپل زوی وژونکو ته د سزا غوښتنه کوي.
په ورته وخت کې د افغانستان د کورنیو چارو وزارت د ویاند مرستیال احمد ضیا ضیا نن دوشنبه ازادي راډیو ته وویل، د حسین علي وژونکي نیول شوي او دوسیهیې نظامي څارنوالۍ ته استول شوې ده.
ښاغلی ضیا زیاتوي: "د وژل شوي افسر په تړاو د ده دوه همکاران د پولیسو لهخوا نیول شوي دي، د نیول شویو کسانو دوسیې له ابتدايي څېړنو وروسته عدلي او قضايي بنسټونو ته استول شوي او اوسمهال دغه دوه نیول شوي کسان تر نظارت لاندې دي."
په ورته وخت کې د کابل امنیه قوماندانۍ ویاند فردوس فرامرز وايي، لومړنۍ څېړنې ښیي چې حسین علي د خپلو همکارانو لهخوا سهواً وژل شوی دی.
خو ښاغلی فرامرز ټینګار کوي چې د وژل شوي افسر دوسیه نظامي څارنوالۍ ته استول شوې او په دې برخه کې به عدالت ټینګ شي.