نړیوالې ورځپاڼې د افغانستان په اړه څه وايي؟
فارن پالیسي
فارن پالیسي وايي، دې ته په پام چې ولسمشر جو بایډن په خپل هېواد کې دننه او له هېواده دباندې ګڼې مسئلې پر وړاندې لري، افغانستان ورته د لومړیتوبونو په سر کې نه دی خو له دې کبله چې د ټرمپ د ادارې او طالبانو د تېر کال د فبرورۍ د موافقې پر اساس له افغانستانه د امریکايي پوځیانو د وتلو وخت په رانږدې کېدو دی، بایډن مجبوره دی چې په دې اړه پرېکړه وکړي.
فارن پالیسي لیکي، سره له دې چې بایډن ژمنه کړې وه چې دا بې پایه جګړه به پای ته ورسوي، خو پوښتنه دا نه ده چې ایا پوځیان به له افغانستانه وباسي بلکې پوښتنه دا ده چې په افغانستان کې ترلاسه شوې بریاوې څنګه خوندي کولی او دا یقیني کولی شي چې په دې هېواد کې د امریکا د څو لسیزو قربانۍ نه ضایع کېږي.
ډېر امریکایان سره له دې چې نه غواړي پوځیان یې په افغانستان کې پاتې شي، د دې پلوي هم نه دي چې د دې هېواد د تېرو دوو لسیزو بریاوې له خاورو سره خاورې شي.
مليټري ټايمز
ملیټري ټایمز ورځپاڼې بیا له افغانستانه د بهرنیو پوځیانو د وتلو په اړه د جرمني د بهرنیو چارو وزیر څرګندونې خپرې کړي.
د جرمني د بهرنیو چارو وزیر هیکو ماس ویلي، چې له افغانستانه د نورو بهرنیو پوځیانو وتل باید د افغانستان د سولې په خبرو کې له پرمختګ سره وتړل شي.
د ښاغلي ماس منظور دا دی، چې که طالبان او دولت په سوله کې پرمختګ کوي، بهرني پوځیان دې هم ووځي او کنې تر هغو دې نه وځي چې په افغانستان کې د دایمي سولې په اړه ډاډ نه وي ترلاسه شوی.
ده دا هم ویلي، دې ته په پام چې د فبرورۍ په ۲۹ نېټه د امریکا او طالبانو د موافقې پر اساس له افغانستانه د امریکايي پوځیانو د وتلو وروستۍ نېټې ته ډېر وخت نه دی پاتې، ګومان نه کوي چې تر هغه مهاله دې د سولې خبرې نتیجه ورکړي نو بهرني پوځیان به یو څه زیاته موده په افغانستان کې پاتې شي.
ملیټري ټایمز د پينټاګون د چارواکو څرګندونو ته هم اشاره کړې چې وايي، طالبانو د تشدد د کمولو په شان خپلې ژمنې نه دي پوره کړي.
اورګنايزېشن اف ورلډ پيس
اورګنایزېشن اف ورلډ پیس هم په خپله انلاین خپرونه (او.ډبلیو. پي) کې له افغانستانه د امریکايي پوځیانو د وتلو موضوع شاربلې ده.
د دې نشریې په باور، د امریکا مخکیني ولسمشر ډونالد ټرمپ په افغانستان کې د امریکايي پوځیانو شمېر ۲۵۰۰ ته راکم کړ چې دا له ۲۰۰۱ را په دې خوا په افغانستان کې د امریکايي پوځیانو تر ټولو لږ شمېر دی.
د دې خپرونې پر اساس، له افغانستانه د مې تر لومړۍ نېټې د ټولو امریکايي پوځیانو بشپړ وتل له یو لړ شرطونو سره تړل شوي و؛ لکه دا چې طالبان به له القاعده سره اړیکې شلوي او له افغان مشرانو سره به د سولې خبرې پیلوي.
دې خپرونې په بل ځای کې د افغانستان شل کلنې جګړې ته اشاره کړې او لیکلي یې دي، دا جګړه چې په ۲۰۰۱ کې پیل شوه، لا هم دوام لري او د بهرنیو اړیکو د شورا په باور طالبان په پنځو کې یوه برخه خاوره په کنټرول کې لري، او د دغه هېواد ډیموکراسي ګواښي.