پرکابل پوهنتون د برید قربانیان: طراح محمدعادل دې عام محضر کې اعدام شي
د حسینې مور زیاتوي، د لور یوازینی ارمان یې دا و چې خپلې لوړې زده کړې بشپړې او هېواد ته د خدمت جوګه شي.
ازادي راډیو د حسینې له موره د کابل پوهنتون د برید په تړاو د نیول شوي کس د اعدام په اړه پوښتنه وکړه، ځواب یې دا و: "قانون شته او شکر چې قانون هغه ده عملي هم شو، ما هم واورېدل چې یو کس یې د عادل په نوم نیولی، زما غوښتنه دا ده چې دغه کسان باید ژوندي پاتې نه شي. د دې لپاره چې نن یې زموږ اولادونه راووژل سبا د نورو کسانو اولادونه وژني، هغه څه چې د خدای قانون او شرعیت ویلي باید پرې تطبیق شي."
دغه مور له له ازادي راډيو سره په خبرو کې وايي، د بې ګناه انسانانو وژنه باید نوره ودرول شي.
دا یوازې د حسینې مور نه ده چې د خپلې لور د قاتل د اعدام خبرې خوښه کړې، بلکې اسحق چې د ده هم ۲۳ کلن زوی په دې برید کې وژل شوی د قانونو د پلي کېدو غوښتنه کوي.
هغه له ازادي راډیو سره په خبرو کې وايي، حکومت د دې توان لري چې دغه کس اعدام کړي: "دغه کسان باید په عام محضر کې اعدام شي، داسې نه شي چې تورې خلطتې په سر ورته واچوي او پټ یې اعدام کړي، زما غوښتنه دا ده چې دغه خلک اعدام شي، څو نورو ته عبرت شي، زما زوی خو بېرته نه راځي، خو باید له دې کسانو نور خلک په امان کې پاتې شي."
د افغانستان سترې محکمې تېره ورځ په کابل پوهنتون د برید په تړاو نیول شوی کس محمد عادل په اعدام محکوم کړ.
سترې محکمې په یوې خپره کړې اعلامیه کې ویلي چې محمد عادل د کابل پوهنتون د برید له طرحانو څخه و.
په اعلاميه کې دا هم راغلي چې د دغه برید یو بل تورن عبیدالله، داعش ډله کې د غړیتوب، ماین خښونې، د چاودیدونکو توکو لېږد او سړي تښتونکي په تور په ۲۵ کاله بند محکوم شوی دی.
دغه شان عبدالکبار او خدا بخش د ملي خیانت، داعش ډله کې د غړیتوب او سړي تښتونې په جرم هر یو په ۱۲ کاله بند محکوم شوي دي.
په ورته وخت کې د افغانتستان د جمهور رئیس لومړي مرستیال امرالله صالح د سترې محکمې دغه ګام ستایلی او ویلي دي چې دغه کړنه د عدالت پلي کولو لپاره ښه زیری دی.
پر کابل پوهنتون د نوومبر ۲۲مه د درېیو کسانو برید کې ۲۲ کسان ووژل او ۴۰ ټپیان شول چې ډېری یې محصلان وو.
د داعش یا اسلامي دولت "خراسان څانګې" د دې برید مسوولیت ومانه.