جان هنټمسن: واشنګټن د اوکراین د ځمکنۍ بشپړتیا دفاع ته ژمن دی

په روسیه کې د امریکا سفیر وايي، واشنګټن د اوکراین د ځمکنۍ بشپړتیا دفاع ته ژمن دی او زیاته کړې یې ده چې د مسکو له خوا د کریمیا د لاندې کولو او د اوکراین په ختیځ کې د کړکېچ راپورته کولو مسئلې له روسیې سره د امریکا په اړیکو کې د وروستۍ خرابۍ اساسي برخه ده.


د ازادي راډیو له روسۍ څانګې سره په مرکه کې جان هنټمسن همدارنګه له روسیې غوښتي، څو په داسې یوې مرستندویه پروسه کې ښکېل شي چې له مخې یې د اوکراین خلک د خپل ملت بېرته اعاده وګوري.


هنټسمن له ازادي راډیو سره په مرکه کې ویلي:


"موږ ته د اوکراین ځمکنۍ بشپړتیا ډېره مهمه ده، هغه څه چې سخت سرغړاوی ترې شوی دی."


روسیې په ۲۰۱۴ میلادي کال کې له اوکراینه د کریمیا ټاپو وزمه لاندې کړه او له هماغه وخت راهېسې د هغو روس پلوو بېلتونپالو ملاتړ کوي چې د اوکراین په ختیځ کې د دې هېواد د حکومتي ځواکونو خلاف جګړه کوي.