د سوريې د کُردانو ډموکراټیک ځواک ۲۸۰ زندانیان بغداد ته سپارلي
عراقي چارواکي وايي، دا زندانیان د هغو سلګونو داعشیانو له ډلې څخه دي چې له کُرد وسلهوالو سره بند دي او پهکې څه د پاسه پینځه سوه عراقي وګړي دي.
عراق وايي، د داعش پهدې نیول شوېو غړو کې ۱۳۰ عراقیان تېره پنجشنبه دوی ته سپارل شوي دي.
داعش ډلې په ۲۰۱۴ میلادي کال کې د عراق او سوریه زیاتې سیمې ونیولې او دغلته يې خپل خلافت اعلان کړ.
د سوريې د کُردانو د ډموکراټیک اتحاد ځواک د امریکايي ځواکونو په ملاتړ له ډېرو سیمو داعشیان پر شامبولي دي او د دې ډلې ګڼشمېر وسلهوال يې نیولي دي.
که څه هم د امریکا ولسمشر ډونالډ ټرمپ په تېره دسمبر میاشت کې له سوريې څخه د ټولو امریکايي سرتېرو د ایستلو پلان اعلان کړ، خو سپینې ماڼۍ په روانه اوونۍ کې وویل چې ۴ سوه امریکايي سرتېري به د یوه سوله ساتي ځواک په چوکاټ کې په سوریه کې پاتې شي.