ولسمشر غني د دولتي بنسټونو د امنیتي پلان جوړول او عملي کول غوښتي

ولسمشر محمد اشرف غني د کورنیو چارو او ماليې له وزارتونو غوښتي دي چې په کابل کې د وروستۍ ترورېستي برید په شان حملو د مخنیوي لپاره د ټولو دولتي تاسیساتو او بنسټونو د امنیت لپاره واضح پلان جوړ او عملي کړي.


د ارګ له خوا په خپره شوې اعلامیه کې ویل شوي چې ولسمشر غني دا غوښتنه پرون د کابینې په غونډه کې وکړه.


ولسمشر غني ویلي، سره له دې چې طالبانو د کابل په وروستۍ حمله کې لاس لرل رد کړي، خو دا ډله مسؤله ګڼل کېږي.


په کابل کې پر فواید عامې وزارت او له معلولینو او د شهیدنو د کورنیو د ملاتړ پر ادارې د وسله والو په وروستي برید کې د ۴ برید کوونکو په شمول ۴۷ کسان ووژل شول او ۲۷ نور ژوبل دي.


د کابل د وروستۍ ترورېستي حملې مسؤلیت تر اوسه پورې کومې ډلې منلی نه دی.