د امریکا د خزانې وزارت په ۶ افرادو او ۳ بنسټونو بندیزونو لګولي

د امریکا د خزانې وزارت په شپږو افرادو او درې بنسټونو بندیزونو لګولي چې د دې وزارت په وینا د یوې ایراني – روسي شبکې شریکوال دي او میلیونونه بېرله تیل یې په سوریه کې د بشار الاسد رژیم ته انتقال کړي.


همدارنګه د دې وزارت په وینا دا شبکه فلسطینۍ حماس ډله او د لبنان حزب الله هم تمویلوي.


د امریکا د خزانې وزارت د بهرنیو پانګو د کنټرول ادارې پرون وویل، روسیې سوریې ته د ایران د تیلو انتقال ممکن کړي او د دې انتقالاتو او د پیسو ورکولو د پټ ساتلو لپاره له مختلفو لارو چارو کار اخلي.


د امریکا د خزانې وزیر سټیون منوچېن په یو بیان کې ویلي:


"موږ نن د یوې پیچلې طرحې پر ضد اقدام کوو چې روسیې او ایران د بشار الاسد د رژیم د پیاوړتیا او د ایران د ورانونکو فعالیتونو د ډاډمنولو لپاره ترې کار اخېست."


پرون د روسیې د استازو د مجلس د بهرنیو اړیکو د کمېټې رئیس لئونید اسلوتسکي دا امریکا د خزانې د وزارت دا اقدام کاملاً غیرې قانوني وباله.


روسیه او ایران د سوریې په اووه کلنه کورنۍ جګړه کې د بشار الاسد د رژیم نېژدې او مهم ملاتړي دي.


هغه کسان او بنسټونه چې د امریکا د خزانې د وزارت د وروستیو بندیزونو هدف دي، د روسیې، سوریې او ایران دي.