دفاع وزارت: په پچیر اګام کې لږ تر لږه ۳۹ داعش وسله وال وژل شوي
د افغانستان دفاع وزارت وايي، د ننګرهار په پچیر اګام کې یې د جمعې له ورځې راهېسې په پوځي عملیاتو کې لږ تر لږه ۳۹ داعش وسله وال وژلي او له دوی څخه یې یوه اندازه وسلې او مهمات هم نیولي دي.
په هغه خبرپاڼه کې چې نن سهار دفاع وزارت خپره کړې، ویل شوي چې پر دې سربېره د غزني ولایت د قره باغ او مالستان په ولسوالیو کې ۳۴ تنه طالب وسله وال وژل شوي او ۵ تنه نور ټپيان شوي او خبره یې چې د بغلان ولایت د بورکې په ولسوالۍ کې ۸ تنه وسله وال وژل شوي، ۱۰ تنه نور ټپیان شوي او د زابل ولایت د میزانې او د کندهار ولایت د میوند په ولسوالیو کې ۷ تنه ترهګر وژل شوي او ۱۵ تنه ټپیان شوي دي.
خبرپاڼه زیاتوي چې د غور ولایت د چهار صدې په ولسوالۍ کې ۵ تنه ترهګر وژل شوي او ۴ تنه ټپيان او د میدان وردګو ولایت د نرخ په ولسوالۍ کې هم ۵ تنه ترهګر وژل شوي دي.
همدا راز دفاع وزارت د تخار په اشکمش کې د درېیو، د هملند په نهر سراج او نادعلي کې هم د درېیو وسله والو د وژل کېدو ادعا شوې او د پکتیا په زرمت د کندز په امام صاحب او د کونړ په څوکۍ ولسوالیو کې د شپږو وسله والو د وژل کېدو یې هم ویلي دي.
په مقابل کې یې وسله والو طالبانو که څه د دې ادعاو په اړه تبصره نه ده کړې، خو د افغانستان په بېلابېلو سیمو کې یې د یو لړ بریدونو په ترڅ کې حکومتي لوري ته د درنې مرګ ژوبلې د اړولو ادعا کړې ده.