مؤحد: تېره اوونۍ تر ۱۰ زیات قاچاق کوونکي په بند محکوم شوي

په تېره یوه اوونۍ کې تر لسو زیات قاچاق کوونکي له نشه‎يي موادو سره د مبارزې عدلي او قضايي مرکز له‎خوا په بند محکوم شوي دي.


له نشه‎يي موادو سره د مبارزې عدلي او قضايي مرکز ویاند خالد مؤحد د چهارشنبې په ورځ ازادي راډیو ته وویل، ۱۴ کسان چې د نشه‎يي موادو د قاچاقو په ۱۴ قضیو کې نیول شوي، د ابتدائیه او استیناف محکمو له‎خوا له ۶ میاشتو څخه نيولی تر ۲۰ کالو پورې پر بند محکوم شول.


ښاغلی مؤحد وايي، په تېره اوونۍ کې ۳۳ کسان چې د افغان ځواکونو له‎خوا په ۲۲عملیاتو کې نیول شوي، له نشه‎يي موادو سره د مبارزې عدلي او قضايي مرکز ته د نورو څېړنو لپاره لېږل شوي دي.


دی وايي:


"نهه کسان د هیروئینو د قاچاقو په بېلابېلو قضیو کې نيول شوي چې غوښتل‎یې د حامد کرزي له هړیوال هويي ډګره هیروئین قاچاق کړي، دوی د نورو څېړنو لپاره عدلي او قضايي مرکز ته سپارل شوي دي. دې کسانو په خپلو خېټو او سفري بکسونو کې نشه‎يي مواد ځای پر ځای کړي او غوښتل‎یې چې هند ته یې قاچاق کړي. "


له‎دې کسانو سره ۳۹ کیلو ګرامه هیروئین، ۲۵۴۰ کیلو ګرامه مورفین، ۵۶۹۰ کیلو ګرامه تریاک، ۵۴ ګرامه شیشه یا کرسټال او ۵۲۵۸ ټابلیټ «K» ګولۍ هم نیول شوي دي.