په هلمند کې چاودنې د یوې ښځې په شمول ۶ کسان وژلي
په وژل شویو کې څلور ملکیان او دوه د ملي اردو سرتېري شامل دي.
د هلمند د والي ویاند عمر ځواک وايي، چاودېدونکي مواد په یوه موټر کې ځای پر ځای شوي وو چې هدف یې په نادعلي ولسوالۍ کې د ملي اردو یو مرکز و.
ښاغلي ځواک نن سهار ازادي راډیو ته وویل:
"مخکې له دې چې بریدګر هدف ته ورسېږي، ویشتل شوی چې په چاودنه کې یې دوه تنه د ملي اردو سرتېري شهیدان شوي او دوه نور ټپیان شوي دي، څلور تنه ملکي وګړي هم په شهادت رسېدلي او اوه نور ټپیان دي."
که څه هم تر اوسه ددې برید مسؤلیت کومې ډلې پر غاړه نه دی اخیستی، خو تر دې مخکې په هلمند کې د دا ډول نورو بریدونو پړه وسله والو طالبانو منلې ده.