د سې شنبې په ورځ د ارمنستان نوی صدراعظم ټاکل کېږي
ټاکل شوې چې د را روانې سې شنبې په ورځ په ارمنستان کې د صدراعظم د ټاکلو لپاره رایې ګیري وشي.
د ارمنستان د انقلابي فدراسیون دوې ورځې مخکې د جمهوریت ګوند په مشرۍ له ائتلافه د وتلو اعلان وکړ.
د دې ګوند زیاتو غړیو په زغرده، د اپوزېسیون د مشر نیکول پاشینیان ملاتړ کړی و او د ارمنستان په کابینه کې د ګوند دریو وزیرانو د پاشینیان د ملاتړ لپاره له دندې استعفی وکړه.
د ارمنستان د انقلابي فدراسیون په اعلامیه کې چې پرون جمعه خپره شوه، ویل شوي چې هدف یې د ولسي پاڅون په پایله کې د رامنځته شوي وضعیت داسې حل دی چې په اساسي قانون او نورو قوانینو برابر وي.
په ارمنستان کې د اپوزېسیون مشر، نیکول پاشینیان ویلي چې د صدراعظم د چوکۍ لپاره دی یوازنی مناسب کاندید دی، خو د ارمنستان انقلابي فدارسیون ګوند نه دي ویلي چې د صدارت لپاره د پاشینیان د کاندیدۍ ملاتړ کوي.