Крим ќе го посети делегација од Турција на чело со братучед на Ердоган
Денес на Крим пристига турска делегација, која во својот состав има членови на турскиот парламент, претставници на владејачката партија, претставници на големиот бизнис и невладини организации - вкупно 27 лица. На нејзино чело ќе биде прв братучед на претседателот на Турција Мехмет Мутлу, изјави лидерот на „Меѓународното евроазиско движење“, филозоф и писател Александар Дугин, пренесува нашето матично издание „Росијскаја газета”.
„Посетата на висока турска делегација на Крим е сосема нова фаза“, смета Дугин. „Овојпат се работи за делегација на владејачката партија на Турција и за најблискиот соборец и роднина на Ердоган. Во суштина тоа е решителен чекор кон признавање на Крим во составот на Русија. И симптоматично е тоа што се случува истовремено со изјавата на Ердоган за прекин на процесот на интеграција во Европа, каде, впрочем, никој не сака ниту има намера да ја прими Турција, и за преориентирањето кон Шангајската организација за соработка. Ердоган е цврсто решен да го замени атлантскиот курс со евроазиски“, објаснува Дугин.
Посетата на турската делегација на Крим е организирана од страна на Меѓународното евроазиско движење. Пристигнувањето на гостите е потврдено од страна на извори од полициските органи и Советот на министри на Република Крим.
Чиј е Крим?
Според Дугин, доаѓањето на турската делегација ја потврдува сериозноста на намерите на Реџеп Таип Ердоган и неговиот дефинитивен избор помеѓу ставот на Русија во врска со Крим и желбата на еден од лидерите на кримскотатарскиот Меџлис Мустафа Џемилев со помош на Турција да ја дестабилизира ситуацијата на полуостровот.
„Мнозинството Кримски Татари кои живеат на територијата на Турција е длабоко и органски интегрирано во турското општество. Затоа, и покрај сета лојалност кон Москва по присоединувањето на Крим кон Русија, факторот Турција и натаму останува исклучително важен“, вели Дугин. “Целта на Ердоган е да се воспостави интензивна и активна социјална и трговска врска меѓу Турција и рускиот Крим. Со тоа е кажано сѐ. Очигледно е дека Анкара одлучи да испрати делегација откако добро ги измери сите можни последици. Самата посета е можна токму под услов на прифаќање на статусот на Крим и можноста за неговото официјално признавање во иднина“.
Турскиот гости ќе останат на Крим до петок, а планираат да се сретнат со водачите на кримскотатарските граѓански организации, претприемачи и раководството на Крим.