ЕК најавува можност возачите да се третираат како пилоти и машиновозачи

Надминувањето на проблемите со кои се соочуваат професионалните превозници при влез и престој во земјите од Шенген-зоната и изнаоѓањето долгорочни решенија за транспортниот сектор беа тема на денешниот конференциски состанок меѓу вицепремиерот и министер за транспорт Александар Николоски, министерот за внатрешни работи Панче Тошковски и заменик-министерката за европски прашања Викторија Трајков, со претставници на Европската комисија и директорката на Директоратот за проширување, Валентина Суперти.

На состанокот учествувале и ресорните министри за транспорт, внатрешни работи и евроинтеграции од земјите на Западен Балкан – Црна Гора, Србија, Босна и Херцеговина, Косово и Албанија, како и директорката на Директоратот за проширување при Европската комисија, Валентина Суперти.

Од Министерството за транспорт информираат дека Николоски ја поздравил иницијативата на Европската комисија за решавање на проблемот и преку аргументирани факти го истакнал ставот на Владата дека е неопходно соодветно решение за оваа категорија работници, имајќи ја предвид природата на нивните работни обврски и потребата од непречено движење во рамки на Шенген-зоната.

„Во очекување на трајно решение, неопходно е Европската комисија реално да го идентификува проблемот со транспортниот сектор и непречениот транспортен тек и во најкраток рок да имплементира соодветни мерки што ќе обезбедат предвидливост и непречена работа на компаниите кои вршат меѓународен патен сообраќај“, порачал Николоски.

Претставниците на Европската комисија ја потврдиле новата визна стратегија на ЕУ, во која професионалните возачи се препознаени како посебна категорија, при што било истакнато дека се разгледува можноста тие да бидат третирани исто како пилотите и машиновозачите.

На состанокот било потврдено и дека примената на биометриската евиденција преку електронскиот систем за влез и излез од земјите на Шенген-зоната се одложува – наместо од почетокот на април, системот ќе започне со примена во септември годинава.

Во меѓувреме, ќе биде формирана работна група на експертско ниво, која веќе следната недела треба да се состане и да ги конкретизира заклучоците од денешниот состанок на високо ниво.

Од Европската комисија ја потенцирале важноста на транспортниот сектор и неговото влијание врз целокупната економија, најавувајќи целосна посветеност за изнаоѓање трајно и прифатливо решение во интерес на сите засегнати страни. Како што било нагласено, темата останува високо на агендата на ЕУ и комуникацијата ќе продолжи и во наредниот период.

Владата, како што наведуваат од Министерството за транспорт, веќе изрази целосна поддршка за превозниците и ги користи сите расположливи механизми за да се овозможи непречена работа во меѓународниот патен сообраќај.

На 30 јануари годинава, одлуката на Европската комисија за донесување нова визна стратегија која ќе ги опфати и професионалните возачи доведе до прекин на блокадите на граничните премини во Северна Македонија, кои ги организираа транспортните компании. Иако стратегијата засега е во форма на документ, без конкретна примена, превозниците ја оценија како значаен чекор напред.

Тогаш од асоцијацијата „Макам транс“ соопштија дека протестите ќе бидат прекинати, откако била добиена потврда за најавените промени. Истовремено, министерот за надворешни работи и надворешна трговија Тимчо Муцунски оствари телефонски разговор со еврокомесарката за проширување Марта Кос, при што било разговарано за одржливо решение за проблемите на превозниците.

И превозниците од Србија и Босна и Херцеговина на истиот датум ги прекинаа блокадите на граничните премини кон Шенген-зоната, започнати како протест против построгите процедури за влез на товарни возила.