Коѕијас: Сложено име различно од грчка Македонија

Грција претпочита да се најде сложено име што ќе ја разликува ПЈРМ од грчка Македонија и кое ќе биде за севкупна употреба, изјави грчкиот министер за надворешни работи Никос Коѕијас.

Коментирајќи ги имињата објавени во медиумите како можни решенија за спорот, Коѕијас истакна дека Атина има свој предлог кој ќе биде изнесен во разговорите со властите во Скопје, наведувајќи дека целта на Атина е да се најде сложено име кое може, но и не мора да биде со географска одредница. За името „Славо Македонија“ тој рече дека тоа е неприфатливо за Албанците во земјава и спомна одредени конкретни имиња од минатото. 

„Исто така постојат низа предлози доставени од тогашниот министер за надворешни работи на Португалија во 1992 година или од Венс и Овен, кои предложија „Нова Македонија“ или како два збора или како еден. Овие предлози се заведени и се предмет по кој ќе го направиме нашиот избор и како владин кабинет стигнавме до нашите опции во разговорите што ќе ги имаме со официјалните лица од соседната земја. Повторувам, сложено име, едно, за сите употреби, рече Коѕијас во интервју за грчката ТВ Антена, пренесува МИА.

Коѕијас исто така ги објасни ставовите на коалициониот партенр во Владата, лидерот на Независни Грци, Панос Каменос, наведувајќи дека  тој не се согласува со употребата на терминот Македонија, но на грчки јазик.