Казакстанда аскерде каза болгон жоокердин өлүмү иликтенүүдө
Казакстандын Абай облусуна үч апта мурун аскерде кызмат өтөөгө барган жоокер каза болду. Маалыматка караганда, анын өлүмүнө менингит оорусу себеп болгон. Бул тууралуу "Азаттыктын" казак кызматы жазды.
Маркум жоокер 25-апрелде коңшу өлкөнүн түндүгүндөгү аскер бөлүгүнө кызмат өтөөгө барганын, 16-майда денеси ысып, ооруканага жаткырылганы кабарланды.
"Баштапкы текшерүү жүргүзүлүп, дарылануу өткөрүлгөндөн кийин жоокердин абалында өзгөрүү болгон жок. 17-майда кошумча текшерүү өткөрүлдү. Анын жыйынтыгы менен бейтап ооруканага жаткырылды. 18-майда абалы кескин начарлады. Реанимация бөлүмүндө медициналык жардам көрсөтүлгөнүнө карабай, аны сактоого мүмкүн болгон жок", - деп айтылат Казакстандын Коргоо министрлигинин маалыматында.
Жоокердин өлүмү боюнча кылмыш иши козголду.
"Орда" сайтынын маалыматына караганда, маркумдун жакындары анын омурткасы ооруп, көзүнүн көрүүсү начар болгонуна карабай аскерге алып кетишкенин, аскер кызматкерлеринин басымына кабылганын айтышты.
"Балам аскерден качып жүргөнүн айтып, "сени жоопко тартабыз" деп коркутушту. Алар иш аскер прокуратурасына өткөрүлөрүн айтышты. Аскердик кызматтан баш тартсаңар төрт миллион теңге айып төлөйсүңөр (7800 доллар) дешти. Бизде андай акча жок. Ижарага алган батирде жашайбыз. Мен иште болгон учурда аны аскерге алып кетишиптир. Поездге отурганда гана көрдүм. Биз дайыма уулум менен байланышта болчубуз. Ал ооруп жатканын мага айткан эмес. Күтүлбөгөн жерден уулум реанимацияга жаткырылды",- деди маркумдун энеси журналисттерге.
Расмий маалыматка караганда, Казакстандын армиясында соңку үч жылда 270 жоокер каза болгон. 86сы өз жанын өзү кыйганы маалымдалган. Алардын жакындары жоокерлердин өлүмүнө аскер жетекчилигин айыптап келишет.
Коңшу өлкөнүн Коргоо министрлигинин маалыматына караганда, каза болгон жоокерлердин өлүмүнө оору, жол кырсыгы же суицид себеп болгон. (AiA)