АКШда чек арада колдонулган CBP One миграциялык тиркемеси иштебей калды
Интернетте тараган айрым тасмалардан АКШ жана Мексика чек арасында турган мигранттардын чек арачылар менен жолугушуусун көрүүгө болот. Анда элге чыккан кызматкерлер чек арадан өтүүгө тыюу салынганын айтып түшүндүрүүдө. Журналисттер бул видео качан тартылганын аныктай алышкан жок.
Euronews жазган маалыматка караганда, CBP One тиркемеси аркылуу чек ара жана бажы кызматтарына алдын ала катталып, АКШда эмне менен алектенери тууралуу кабар берип, күнүнө болжол менен 1450 адам чек арадан кирип турган. Тиркеменин колдонуучуларынын басымдуу бөлүгү Куба, Венесуэла, Гаити жана Мексиканын жарандары болгон. Аталган система иштеп турган чакта бир миллиондон ашык мигрант АКШга кирүүгө мүмкүндүк алганы айтылат.
Буга чейин "Азаттыктын" кабарчылары менен сүйлөшкөн борборазиялык мигранттар да АКШга кирүү үчүн CBP One тиркемесин колдонорун айтып беришкен.
20-январда Дональд Трамп АКШнын президенти кызматына расмий киришип жатып сүйлөгөн сөзүндө Кошмо Штаттардын түштүктөгү чек арасында өзгөчө кырдаал жарыялай турганын, мыйзамсыз мигранттар АКШга кирбестен, Мексикада каларын шарттай турган саясатка басым жасарын айткан:
“[АКШга] мыйзамсыз киргендердин баары дароо токтотулат жана биз миллиондогон, миллиондогон кылмыштуу чоочундарды келген жагына кайтаруу жараянын баштайбыз”.
CNN жазганына караганда, иммиграция темасы Трамп үчүн абдан маанилүү. Анын командасы даярдап жаткан буйруктар топтомунда бул чөйрөдөгү саясатты түп-тамыры менен өзгөртүү каралган. Ал чечимдер АКШда жашап жаткан жана Мексика менен чек арада башпаанек издеген келгиндерге таасир этет деп айтылууда.
Трамп 2017-2021-жылдары Ак үйдө отурганда эле мыйзамсыз жана мыйзамдуу иммиграциянын кыскарышын жактап чыккан. Анын администрациясы башпаанек берүү, депортация жана виза берүүнү тескеген саясатты өзгөртүү боюнча бир катар чараларды кабыл алган.(AiA)