Илдет маалындагы Нооруз майрамы
Башка аймактардын дээрлик баарында майрамга арналган иш-чаралар уюштурулууда.
Президент Садыр Жапаров кыргызстандыктарды көктөм майрамы менен куттуктап, быйылкы жаз — республикабыз үчүн өзгөчө жаз деп сыпаттады:
«Анткени элибиз өтө маанилүү жана жооптуу учурдун — буга чейинки жетишкендиктерибизди бекемдеп, реформаларды жүзөгө ашыруу үчүн дагы бир маанилүү кадамды жасоонун, жаңы Конституциянын долбоору боюнча референдумду өткөрүүнүн алдында турат. Анын мааниси коомубузду жаңы бийиктерге, бакубат жашоого сүрөөгө, улуттун ынтымагын ширөөгө багытталган».
Оору эсте, сактануу унутулду
Көктөм майрамы экинчи борбор Ошто чоң салтанат менен өттү. Шаар тургундарына концерттик программа уюштурулуп, театралдаштырылган оюн-зоок менен коштолду.
Калаа тургундарын куттуктаган Оштун мэри Таалайбек Сарыбашов бир жыл мурунку коронавирус пандемиясынын оор күндөрүн эске салып, жардам бергендерге ыраазчылыгын билдирди:
«Көзгө көрүнбөгөн илдет менен баарыбыз чогуу кармаштык. Ош шаарынын жашоочулары, азамат уул-кыздары калктын өмүрүн сактап калуу үчүн жан үрөп, күнү-түнү тынбай иштешти. Урматтуу замандаштарым, учурдан пайдаланып баарыңыздарга күжүрмөндүк, акылман-даанышмандык, боорукердигиңиздер үчүн таазим этип, ыраазычылык билдирем».
Ковид боюнча республикалык штабдын 21-марттагы маалыматы боюнча, акыркы суткада 68 адам коронавирус жуктуруп, эки адам илдеттен көз жумду. Ооруга чалдыккандардын басымдуу бөлүгү Бишкекте – 45 адам, Чүй облусунда 12, Ысык-Көл облусунда 6, Ош шаарында 4 адам. Калган аймактарда коронавируска чалдыккандар жок.
Оштогу майрамда санитардык талаптар сакталган жок. Жергиликтүү бийлик элди топтоонун алдында адистер менен кеңешкенин, абал туруктуу болгону үчүн массалык иш-чаралар уюштурулганын айтып ынандырууда.
Жергиликтүү бийлик «Кыргыз элинин каада-салтын көрсөтүү» сынагы, боз үй тигүү жарышы, Аш фестивалы, Кыргыз улуттук спорттук оюндары боюнча мелдештерди уюштурду. Мындай иш-чаралар өлкөнүн Баткен облусунан башка баардык аймактарда өттү.
Кымбатчылыкта майрамдоо зарылбы?
Ош мэриясы майрымды өткөрүүгө 600 миң сомго чукул каражат короткон. Азык-түлүк кымбаттап, элдин кирешеси азайып турган учурда мэриянын бул аракеттин сынга алгандар да болду.
«Учурдагы абалды эске алганда, минтип майрам уюштуруу туура эмес. Ушул майрамдын ордуна жетпеген нерселердин ордун толуктап, кайрымдуулук иштерге жумшаса жакшы болмок. Күнүгө эле майрамдап жүрө бербей, ар нерсе чеги менен болушу керек. Элдин маанайы ансыз деле жакшы, ар ким өзүнүн көңүлүн көтөрүп үй-бүлөсү менен майрамдаса болот», - деди Ош шаарынын тургуну Азиретали Амитов.
Оштун борборбук аянтында байбичеси менен оюн-зоок көрүп жүргөн Аби Калмаматов аксакал мындай майрамдар элдин жан дүйнөсүн байытат, деген пикирде:
«Каатчылык, деп эле жатып калган да болбойт. Кудайга шүгүр, заманыбыз - тынч. Таптакыр эле ачарчылык болуп калган жок. Кээде майрамдап, элге дем берип туруш керек. Ошондо келечекке умтулуу пайда болот».
Буга чейин өлкө боюнча жаңы жылдык жасалганын өзүнө эле 1 миллион 700 миң сомдон ашуун каражат жумшалганы коомчулукта кризис учурундагы ашепке ысырапкорчулук катары сынга алынган эле.
Жалал-Абад шаары 2021-жылды тосуу маалында балаты үчүн 800 миң сом бөлүп, рекорд койгон. Ош шаардык бийлиги Жаңы жылга каражат коротпойбуз дегени менен иш жүзүндө дээрлик 700 миң сом каражат жумшаган.
2020-жылы 18-мартта өлкөдө коронавирус жуктурган алгачкы учур катталган. Ага байланыштуу Ноорузду майрамдоого жана башка эл чогулган иш-чараларга тыюу салынган. Былтыр, ошентип, 22-марттан тарта өзгөчө кырдаал режими киргизилген.
"Нооруз" - байыркы фарс тилинин "науризи" деген сөзүнөн алынып, кыргыз тилинде "нау" – “жаңы”, "рузи" – “күн” деген маанини билдирет.
Нооруз - Азия элдеринин эң байыркы майрамдарынын бири. Нооруз - күн менен түн теңелген, жер жарылып чөп, желин жарылып сүт чыккан учурга туш келет. Жаз менен кошо айлана кулпунуп, адамдар да келечекке үмүт артат.