АКШда президент Трамптын шайлоо алдындагы митинги өттү
Бир жарым сааттык сөзүндө президент Дональд Трамп шайлоодогу атаандашы Жо Байденди сынга алды. Андан тышкары маалымат каражаттарын “радикал солчулдарды” айыптады.
Америкадагы башаламандыктар тууралуу сүйлөп жатып, Трамп өзүнө “мыйзам менен тартиптин президентимин” деген баа берди. Ал ошондой эле айрым нааразылык акцияларда эстеликтердин талкаланышын жана Америка желегинин өрттөлүшүн сынга алды.
Митингге катышарын Интернет аркылуу миллионго чукул адам билдиргени менен, бирок Талсадагы аянтка чогулган адам кыйла аз болду. Трамптын айланасындагылар буга оппоненттерин күнөөлөштү. Маалымат каражаттары болсо буга Оклахома штатында коронавирус инфекциясынын жайылуусуна байланыштуу кооптонуу себеп болгонун жазышты.
Саламаттык сактоо департаменти Талсадагы митингдин катышуучуларына коронавирус жугуу коркунучу чоң экенин эскертти. Митингдин алдында Трамптын штабында иштеген алты кызматкерден COVID-19 вирусу аныкталганы маалым болду.
Буга карабай, Талсадагы митинг март айында карантин жарыялангандан берки убактагы шайлоо алдындагы эң ири иш-чара болду.
Акыркы убактардагы сурамжылоолор боюнча президент Дональд Трамп атаандашы Жо Байденден артта келе жатат.