Түркмөнстанда азык-түлүккө кезек сакталууда

Түркмөнстанда ушул күндөрү шекер, күрүч жана өсүмдүк майын саткан мамлекеттик дүкөндөрдүн алдына адамдардын узун кезектери пайда болду. «Азаттыктын» түркмөн кызматынын кабарчысынын маалыматы боюнча 100дөн ашык адам кезек күткөн учурлар бар. 

- Алардын арасында жаш баласын жетелеген аялдарды, кары-картаңдарды, өспүрүмдөрдү көрүүгө болот. Алар кезекке таң эртеден эле туруп жатышат. Шекер, күрүч жана өсүмдүк майы дүкөндөрдүн арткы «ууру эшиктери» аркылуу сатылып жатат, - деп билдирди «Азаттыктын» кабарчысы.

Маалыматка ылайык, учурда ар бир адамга килосун 8 манаттан (2,5 доллар) төлөп, 3 килограмм күрүч, 7 манатка (2 долларга жакын) 1 килограмм шекер сатып алууга уруксат берилди.

Ал эми жеке менчик дүкөндөрдө күрүчтүн баасы 20 манаттан, шекер килосуна 12 манаттан сатылууда. Базарларда азык-түлүктүн баасы кескин көтөрүлүп жатат.

Расмий бийлик өкүлдөрү эмне себептен азык-түлүккө чектөө киргизилгенин түшүндүрүшкөн эмес.

Түркмөнстанда акыркы эки жылдан бери күнүмдүк керектелчү негизги азык-түлүк товарларынын тартыштыгы байкалып жүрөт. Буга чейин бир нече жолу шекер, жумуртка, өсүмдүк майы, ун менен нан тартыш болуп, мамлекеттик дүкөндөрдүн алдына кезектер пайда болгон.