Кыргызстанга 112 автоунаа мыйзамсыз ташылып келгени аныкталды
Кыргызстандын аймагына 112 автоунаа контрабандалык жол менен ташылып келгени, андан мамлекет 100 млн. сом зыян тартканы аныкталды. Бул тууралуу Экономикалык кылмыштарга каршы күрөш боюнча мамлекеттик кызмат (Финансы полициясы) кабарлады.
Транспорт каражаттарынын 25 даанасы жүк ташуучу унаалар болгон. Алардын баары учурда камакка алынды.
Бажы төлөмү төлөнбөй өлкөгө киргизилген бул автоунааларды Жалал-Абад облусунун Кара-Көл шаардык автотранспортту каттоо жана айдоочулук күбөлүк берүү департаментинин кызматкерлери каттап беришкен. Департаменттин кызматкерлерине карата Башкы прокуратура Кылмыш-жаза кодексинин 304-204-350-беренелери (“Кызмат абалынан кыянаттык менен пайдалануу”, “Контрабанда”, “Документтерди жасалмалоо”) менен кылмыш ишин козгоду. Тергөө бүтүп, иш сотко өткөрүлдү.
Быйыл жыл башында да Кыргызстанга импорттолгон “DAF”, “MAN”, “IVECO”, “SCANIA” жана башка үлгүдөгү 354 жүк ташуучу автоунаа мыйзамсыз алынып келгени аныкталган. Анда автоунаалар эч кандай бажы төлөмү алынбай турган трактордун коду менен катталганы такталган. (ErN)