“Көлікті басқара алмай қалған“: Алматыда автобус ірі жол апатына ұшырады
Алматы тұрғыны қалада жолаушылар автобусы жол-көлік оқиғасына ұшырағаны туралы айтып берді. Жағдайға қатысты қалалық полицияның баспасөз қызметі пікір білдірді, деп хабарлайды Tengrinews.kz.
Әлеуметтік желідегі жазба
Әйел танымал әлеуметтік желіде эмоцияға толы жазба жариялады. Оның айтуынша, ол баласымен бірге апатқа ұшыраған автобустың ішінде болған.
"Бүгін ұлым екеуміз Бөкейханов көшесі мен Райымбек даңғылы қиылысында жол апатына ұшырадық. Кім кінәлі екенін білмеймін. Автобус бұрылысқа сыймай қалған сияқты болды. Соққы өте қатты болды, дыбысы естілді - өте қорқынышты екен. Қатты қорықтық", - деп хабарлады ол.
Біз жағдайға байланысты пікір алу үшін полицияның баспасөз қызметіне хабарластық.
Полиция не деді?
Алматы әкімшілік полиция басқармасы кезекші бөлімінің мәліметінше, жол-көлік оқиғасы бүгін сағат 13:25-те Алматының Жетісу ауданында болған.
"Алдын ала мәлімет бойынша, Golden Dragon маркалы автобустың жүргізушісі Бөкейханов көшесімен солтүстік бағытта келе жатып, Райымбек даңғылына жақындағанда рөлге ие бола алмай, жол жиегінде тұрған ЗИЛ маркалы жүк көлігіне соғылған. Соққы салдарынан ЗИЛ алдында тұрған ГАЗ маркалы автокөлікпен соқтығысқан", - деп хабарлады полиция.
Полиция мәліметінше, жол апаты салдарынан төрт адам медициналық көмекке жүгінген, олардың арасында ЗИЛ жүргізушісі мен автобус жолаушылары бар. Жол-көлік оқиғасы дерегі бойынша тексеріс жүргізіліп жатыр. Апаттың мән-жайы мен себептері анықталады.
Айта кетейік, 19 қыркүйекте Алматыда автобус пен Toyota Highlander соқтығысқаннан кейін тоғыз адам медициналық көмекке жүгінді. Жол апаты Төле би даңғылы мен Жұмалиев көшесінің қиылысында болған.