“Командамыз мықты“ - Қазақстан құрамасының капитаны Испаниямен өтетін матч туралы
23 қыркүйекте Қазақстан құрамасы бейресми Әлем чемпионатының 1/4 финалында Испания құрамасымен кездеседі.
Щукиннің айтуынша, біздің құраманы тартысты кездесу күтіп тұр.
"Билли Джин Кинг кубогінің финалдық кезеңінде Қазақстанның намысын қорғау – біз үшін үлкен мәртебе. Біз Испанияға қарсы ертеңгі кездесуді асыға күтіп отырмыз. Біздің құрамамыз мықты және жеңіске жету үшін қолдан келгеннің бәрін жасаймыз. Сонымен қатар Испания құрамында мықты теннисшілер бар екенін және олардың өте салмақты қарсылас екенін жақсы түсінеміз. Бізді тартысты кездесу күтіп тұр. Сондықтан матчке барынша дайын болып, үздік ойынымызды көрсетуіміз маңызды", - деді ол баспасөз мәслихатында.
Құрама көшбасшысы Юлия Путинцева да жаттықтырушыны қолдап, испаниялықтармен кездесуде көп нәрсе өзіне және командаластарына байланысты болатынын атап өтті.
"Менің ойымша, алдағы кездесуде тәжірибем маңызды рөл атқаруы мүмкін. Мен әрқашан соңына дейін күресемін және әр матчте, әсіресе Қазақстанның намысын қорғаған кезде, жауынгерлік мінезімді көрсетуге тырысамын. Осы жігерімді командадағы қыздарға да жеткізіп, бәріміз бірге үздік ойынымызды көрсете аламыз деп үміттенемін. Біздің құрамамыз шынымен де мықты және көп нәрсе өзімізге байланысты. Ең бастысы – өзімізге деген сенімді сақтап, ойын жоспарымызды ұстану және әр ұпай үшін күресу", - деді ол.
Айта кетейік, Билли Джин Кинг кубогінде Қазақстан құрамасы сапында Юлия Путинцева, Жібек Құламбаева, Соня Жиенбаева және Анна Данилина өнер көрсетеді. Әлемдік рейтинг көшбасшыларының бірі және Қазақстанның үздік теннисисі Елена Рыбакина жарақатына байланысты турнирге қатыспау туралы шешім қабылдады.
Испания құрамасына келетін болсақ, командада елдің ең танымал теннисшісі Паула Бадоса жоқ, бірақ Кристина Букша мен Кейтлин Каведо рейтингте Юлия Путинцевадан жоғары тұр.
Instagram-дағы бұл жарияланымды көру
Юлия Путинцеваның (@yulia_putintseva) жазбасы
Айта кетейік, Испания мен Қазақстан құрамалары бұған дейін Билли Джин Кинг кубогі аясында кездескен - 2022 жылы испаниялықтар 3:0 есебімен басым түскен болатын.
Билли Джин Кинг кубогы (Billie Jean King Cup) - әйелдер теннисіндегі басты халықаралық командалық турнир, Әлем чемпионатының баламасы. Бұл сында теннисшілердің ұлттық құрама сапында өнер көрсетуге сирек мүмкіндігі бар. Қазақстан құрамасы бұл кубокті әлі бірде-бір рет жеңіп көрген жоқ.
Биыл Билли Джин Кинг кубогі Қытайдың Шэньчжэнь қаласында өтіп жатыр және 27 қыркүйекте финалмен аяқталады.
Рыбакина Қазақстан құрамасына қатысты шешімін түсіндірді