Экология министрлігі Атыраудағы ауаны ластайтын негізгі көздерді атады
Қыркүйектің басында Атырау тұрғындары ауа сапасы нашарлап, жағымсыз иіс шыққанына шағымданды. Экология министрлігі қыркүйектің бірінші және екінші онкүндігінде Атыраудағы кейбір атмосфералық ауаны бақылау бекеттерінде ластаушы заттар мөлшері туралы ақпарат тіркелгенін растады. Ведомство осыған байланысты мәлімдеме жасады, деп хабарлайды Tengrinews.kz.
Экология министрлігінің мәліметінше, негізгі ластаушы компонент - күкіртсутек.
"Кейінгі бірнеше жылда Атырау ауаның ластану деңгейі бойынша "көшбасшылар" қатарында. Қала үшін күкіртті сутегі әсіресе өзекті. Қолайсыз метеорологиялық жағдайлар және шығарындылар көздері болған кезде белгіленген шекті рұқсат етілген концентраттан (ШРК) едәуір асып кету жағдайлары тіркеледі", - делінген Экология министрлігінің мәлімдемесінде.
Ведомство негізгі ластау көздерін атады.
"Негізгі көздер: АМӨЗ, "Атырау облысы Су Арнасы" КМК кәріз объектілері, "Квадрат" булану алаңы, жылыту қазандықтары мен ЖЭО. Қолайсыз метеорологиялық жағдайлар қосымша әсер етеді – желдің аздығы, түнгі уақыт және ластаушы заттардың таралу жылдамдығының төмендігі", - деп мәлімдеді Экология министрлігі.
Министрлік Атыраудағы ауаның ластануын азайту үшін орталық және жергілікті мемлекеттік органдар атмосфераға шығарындыларды азайтуға, инфрақұрылымды жаңғыртуға және экологиялық бақылауды күшейтуге бағытталған бірқатар шара қабылдап жатқанын хабарлады.
8 қыркүйекте Экология министрлігі Атырау облысы бойынша экология департаментінің жоспардан тыс тексеруді бастағаны туралы хабарлаған болатын.
"Экологиялық кодекстің талаптары шеңберінде ірі табиғат пайдаланушылардың бірқатар кәсіпорнында мониторингтің автоматтандырылған жүйелері орнатылған және деректер Қазақстанның қоршаған ортасы мен табиғи ресурстарының жай-күйі туралы Ұлттық деректер банкіне беріледі", - деді министрлік өкілдері.
Экология министрлігі қол жетімді ең жақсы техниканы, кәсіпорындарда мониторингтің автоматтандырылған жүйесін енгізу, қолданыстағы заңнама талаптарын сақтау атмосфералық ауаның ластану деңгейін төмендетуге мүмкіндік береді деп есептейді.
Еске сала кетейік, Атырау тұрғындары желіде қаладағы өткір жағымсыз иіс салдарынан денсаулықтары нашарлап, жөтел мен бастың ауруы пайда болғанына шағымданған болатын.