Ендігі мақсаты - Канело: Әлімханұлының жоспары белгілі болды
Дүниежүзілік бокс ұйымының (WBO) президенті Густаво Оливьери Әлімханұлы мен қазіргі әлем чемпионы, ұлыбританиялық Хамза Шираздың командаларына келіссөз жүргізуге берілген уақыт аяқталғанын мәлімдеп, міндетті промоутерлік сауда тағайындады.
Қазақстандық боксшының менеджері Ширазбен жекпе-жек өтпей қалуы мүмкін деп есептейді. Мұндай жағдайда Жәнібек чемпиондық белбеу үшін басқа қарсыласпен жұдырықтасады.
"Бүгін біз де, жанкүйерлер де Шираз бен Жәнібектің жекпе-жегі ресми жарияланады деп күттік. Бірақ келісімшартқа қол қойылмады. Біз олардың кез келген ұсынысына дайын едік. Хамза қорқады дегім келмейді, бірақ меніңше, ол Жәнібекпен жұдырықтаспайды. Егер жекпе-жекке дайын болса, қайда, қашан және қандай жағдайда өтетінін әлдеқашан ұсынар еді. Әзірге тым-тырыс. Неге екенін білмеймін", - деді менеджер Tengri Sport-қа берген сұхбатында.
Берік Сұлтанның пікірінше, Жәнібекпен жұдырықтасқысы келмесе, ұлыбританиялық боксшы чемпиондық белбеуден бас тартуға мәжбүр болады. Ондай жағдайда титулға таласу мүмкіндігі рейтингте одан кейін тұрған боксшыға беріледі.
"Меніңше, дүйсенбі немесе сейсенбіде Хамза титулдан бас тартады. Неге? Өйткені жұдырықтасқысы келсе, бірден келісер еді. Біз тараптан ешқандай мәселе жоқ. Тіпті тегін болса да, бір долларға болса да, Лондонда болсын, өзі шыққан Пәкістанда болсын - бәріне дайынбыз. Одан кейін не болады? Егер Хамза белбеуден бас тартса, Жәнібек титул үшін рейтингте төмен тұрған боксшымен жұдырықтасады", - деп атап өтті ол.
Әлімханұлы мен Канело жекпе-жегі: қазақстандықтың басты мақсаты
Берік Сұлтан келіссөздер қалай аяқталса да, Әлімханұлының мақсаты өзгермейтінін айтты. Қазақстандық боксшы екінші орта салмақтағы төрт негізгі чемпиондық белбеудің бәрін жинауды көздейді. Ол үшін осы салмақтағы ең танымал боксшылардың бірі - мексикалық Сауль "Канело" Альвареспен кездесу қажет болуы мүмкін.
"Егер жекпе-жек өтсе, Жәнібек Хамзаны нокаутқа түсіреді. Мұны бәрі біледі, Хамзаның өзі де біледі. Біз күтеміз және Хамзаның титулын аламыз. Одан кейін Канеломен келіссөз бастаймыз. Өйткені біздің басты мақсатымыз - осы салмақтағы барлық чемпиондық белбеуді жинау", - деді менеджер.
WBO Әлімханұлы мен Шираз арасындағы жекпе-жекке арналған промоутерлік сауданы 16 қыркүйекке белгіледі.
Канело әзірге чемпиондық белбеусіз
Қазір Канело екінші орта салмақтағы чемпиондық белбеуі жоқ. Сондай-ақ, ол WBO рейтингінен шығарылған.
Алайда 31 қазанда мексикалық боксшы WBC тұжырымы бойынша чемпиондық атақты қайта иеленуге мүмкіндік алады. Ол жеңіліс көрмеген француз Кристиан Мбиллимен жұдырықтасады.
Instagram-дағы бұл жарияланымды көру
Saul Alvarez (@canelo) жарияланымы
Бұған дейін Сауль Альварес осы салмақта WBC белбеуін иеленіп, WBA Super, IBF және WBO тұжырымдары бойынша да әлем чемпионы болған. Алайда былтыр қыркүйекте Теренс Кроуфордтан жеңіліп, барлық белбеуінен айырылды.
Арада бір жыл өткенде мексикалық боксшы чемпиондық атақтарының бірін қайтару үшін рингке қайта оралмақ.
Жәнібек Әлімханұлының менеджері айтқан жоспарға қарағанда, қазақстандық боксшы Канелоның чемпиондық белбеуді жеңіп алғанын, ал кейін өзі сол титулға басты үміткер атануды көздеп отыр.
Instagram-дағы бұл жарияланымды көру
JANIBEK | QAZAQ STYLE (@janibek_alimkhanuly) жарияланымы