“Қайрат“ Конференция лигасындағы қарсыластарын білді: Еуропа БАҚ-тары не жазып жатыр?
Жеребе қорытындысы бойынша "Қайрат" сырт алаңда италиялық "Аталантамен", нидерландылық "Твентемен" және латвиялық "Ригамен" кездеседі.
Ал Алматыдағы Орталық стадионда грекиялық "Панатинаикосты", румыниялық "Университатя Крайованы" және швециялық "Мьельбюді" қабылдайды.
Еуропалық БАҚ-тар Қазақстанға ұзақ жол жүру мәселесіне ерекше тоқталған.
Instagram-дағы бұл жарияланымды көру
«Қайрат» ФК | FC Kairat Almaty (@f.c.kairat) жарияланымы
Румыниялық 3minute басылымы "Университатя" үшін негізгі сынақ қарсыластың аты емес, Алматыға дейінгі ұзақ сапар болатынын жазады. Крайова мен Алматы арасындағы қашықтық шамамен 5500 шақырым.
"Алматылық "Қайрат" – өзіндік бір тұзақ. Оның еуропалық алып клуб деген атағы жоқ, алайда Қазақстанға сапар “Крайова” үшін биылғы еурокубок маусымындағы ең қиын матчтардың біріне айналуы мүмкін. Ұзақ жол, уақыт белдеулерінің ауысуы, шаршау, бейтаныс алаң мен өзгеше ойын ырғағы – дәл осындай матчтарда психологиялық тұрғыдан дайын емес команда не болғанын түсінбей жатып-ақ ұпай жоғалтуы мүмкін", – деп жазады басылым.
Грекиялық Pagenews те "Панатинаикосты" маусымдағы ең қиын сапарлардың бірі күтіп тұрғанын атап өтті. Афина мен Алматы арасындағы қашықтық шамамен 6600 шақырым.
"Мұндай жағдайда қиындық тек қарсыласқа байланысты емес. Ұзақ жол, бейімделу және команданың жалпы кестесі еуропалық матчта ұжымды басқаруда шешуші рөл атқаруы мүмкін. “Панатинаикос” бұл ойынға өте байыппен қарауы тиіс, өйткені сырт алаңда алынған ұпайлар турнирлік кестедегі жағдайға тікелей әсер етуі мүмкін", – деп жазады басылым.
Швециялық Footballskanalen де Қазақстанға сапардың алыстығына тоқталған. Олар "Мьельбюдің" "Қайратпен" кездесуін жеребенің басты ерекшеліктерінің бірі ретінде атап, оны "Аталантаға" қарсы сырт алаңдағы матчпен қатар қойған. Хеллевиктен Алматыға дейінгі арақашықтық шамамен 5650 шақырым.
"Оларды Қазақстанға ұзақ сапар күтіп тұр. Онда олар өткен маусымда Чемпиондар лигасында ойнаған алматылық "Қайратпен" кездеседі", – делінген жарияланымда.
"Қайрат" Конференция лигасының ортақ кезеңіне қалай өтті?
Еске сала кетейік, алматылық команда еурокубоктардың күзгі бөлігіндегі Қазақстанның жалғыз өкілі."Қайрат" жолын Чемпиондар лигасының іріктеу кезеңінен бастап, черногориялық "Сутьеска" мен кипрлік "Омонияны" жеңді. Кейін болгариялық "Левскиге" есе жіберіп, шешуші плей-офф кезеңіне өте алмады.
Еуропа лигасы іріктеуінің төртінші кезеңінде "Қайрат" Бельгияның "Андерлехтімен" кездесті. Екі матч та қарсыластың пайдасына 3:0 есебімен аяқталып, алматылық клуб Конференция лигасының ортақ кезеңіне түсті.
Instagram-дағы бұл жарияланымды көру
«Қайрат» ФК | FC Kairat Almaty (@f.c.kairat) жарияланымы
Конференция лигасының 2026/27 жылғы ортақ кезеңі: нені білу керек?
Бұл кезеңде командалар Чемпиондар лигасы мен Еуропа лигасындағыдай 8 емес, 6 матчтан өткізеді.
Ортақ кезең матчтарының күндері:
1-тур — 15 қазан;2-тур — 22 қазан;3-тур — 5 қараша;4-тур — 26 қараша;5-тур — 10 желтоқсан;6-тур — 17 желтоқсан.
Ортақ кезең қорытындысы бойынша плей-офф сатысына 24 команда шығады. Алғашқы сегіздік бірден 1/8 финалға өтеді. 9-дан 24-орынға дейінгі командалар қосымша түйісу матчтарын өткізеді. Ал 25-тен 36-орынға дейінгі клубтар еурокубоктағы жолын аяқтайды.
Матчтардың нақты реті мен толық кестесі 30 тамыздан кешіктірілмей жариялануға тиіс.
Instagram-дағы бұл жарияланымды көру
UEFA Conference League (@conferenceleague) жарияланымы