“Жыламай, төбелес!“: Әлімханұлы чемпионның айыптауына жауап берді
Берік Сұлтанның айтуынша, WBO-ға тағылған айыптар британдық нокаутшының Әлімханұлына қарсы жекпе-жекке шыққысы келмейтінімен байланысты.
"Мен оның пікіріне қатысты айтқым да келмейді. Қалай ойлағысы келсе, солай ойлай берсін. Бірақ ресми түрде, заңды түрде Жәнібек - міндетті үміткер. WBO барлық құжатты ұсынды.
Хамза неге бұлай дейді? Менің пікірім, ол бар болғаны Жәнібекпен жұдырықтасқысы келмейді. Мен неге бұлай ойлаймын? Өйткені орта салмақта жұдырықтасуға мүмкіндігі болған кезде, ол бас тартты. Мұны бәрі біледі. Оның командасы қалай әрекет ететінін білмеймін, бірақ олардың төбелескісі келмейтіні көрініп тұр. Бұл түсінікті де, Жәнібек мүлдем басқа деңгей, элиталық боксшы және Хамзаны оңай жеңеді", - деді Берік Сұлтан тілшімізбен болған әңгімеде.
Әлімханұлы не деп жауап берді?
Әлімханұлының өзі де Шираздың сөздеріне қатысты пікір білдірді. Қазақстандық боксшы әлеуметтік желіде эмоционалды жазба жариялады.
"Ол неге жай ғана: "Кәне, жұдырықтасайық!" деп айтпайды? Менің түсінбейтінім осы. Бұл - спорт қой! Егер өзіңді чемпионмын деп есептесең, оны дәлелде. Рингке шық, мықтылармен айқас және бәріне шын мәнінде қабілетіңді көрсет. Подкастта отырып жыламай, рингке шық та, төбелес!" - деп жазды Әлімханұлы Instagram-да.
Еске сала кетейік, Шираз осыдан екі жыл бұрын Әлімханұлымен жекпе-жектен қашқан болатын. Ол кезде британдық боксшы қазақстандық иелік еткен WBO титулына міндетті үміткер болған еді.
Жекпе-жек туралы келіссөздер британдық тараптың бастамасымен үзілді: Шираз өз салмағында басқа чемпиондық белбеуді жеңіп алуға тырысып, кейін жоғары салмақ дәрежесіне ауысып кетті. Енді WBO Әлімханұлы мен Шираз арасындағы жекпе-жекті британдық чемпион болып отырған супер орта салмақ дәрежесінде өткізуді міндеттеді.
Instagram-дағы бұл жарияланымды көру
Hamzah Sheeraz-дан публикация (@hamzahsheeraz)
"Хамза бізге мүлдем қызық емес"
Берік Сұлтанның айтуынша, Жәнібек бұған дейін Ширазбен спаррингте кездесіп, оған өзінің жоғары деңгейін көрсеткен. Бұл ретте менеджердің пікірінше, британдықтың командасы әдепсіз әрекет етіп отыр.
"Қаншама үміткерлеріміз болды, оларды ешкім танымайтын. Жәнібек олармен жекпе-жектен ақша тапқан жоқ, бірақ біз ештеңе айтпадық. Заңның аты - заң: егер сен белбеуіңді міндетті үміткерден қорғауың керек болса, қорға. Бұл талқыланбайды, бұл жылдар бойы өзгермеген ереже.
WBO Хамзаға Жәнібекпен жұдырықтасуды бұйырды. Егер бас тартса, титулын қалдырып, беделіне нұқсан келтіреді", - деп есептейді менеджер.
Берік Сұлтан Жәнібек үшін рингке кіммен шығу маңызды емес екенін атап өтті. Олар үшін сарапқа салынатын титулдардың маңызы әлдеқайда жоғары.
"Шыны керек, Хамза бізге мүлдем қызық емес. Жәнібек оны оңай нокаутқа түсіреді. Ол Джошуа, Тайсон Фьюри, Шакур немесе Кроуфорд сияқты супержұлдыз емес, деңгейі ондай емес. Мұны бәрі біледі. Бізге тек оның титулы керек.
Жәнібек оны нокаутқа түсіргенде, бұл оның танымалдылығына еш әсер етпейді. Ол - жай ғана боксшы. Егер Жәнібек Кроуфордты, Канелоны немесе Мунгияны нокаутқа түсірсе, бұл басқа әңгіме. Бұл оны бірден танымал етер еді", - деді менеджер.
Шираз жекпе-жектен қашып құтылған күннің өзінде, Әлімханұлы үшін ештеңе өзгермейді деп есептейді ол.
"Біздің мақсатымыз мынау: Хамзаны жеңеміз, егер ол төбелеспесе, оның титулын басқа біреумен таласып аламыз. WBO чемпионы боламыз, ал қазанда Канело, бәлкім, Мбиллиді жеңіп, ол да чемпион атанар.
Біз орта салмақтағыдай ары қарай жылжып, титулдарды жинай береміз. Бірақ кез келген адаммен қорғау емес, титулдарды біріктірумен айналысамыз. Біз үшін бастысы - титулды алу, содан кейін Канело Мбиллиді жеңсе, оның командасына хат жолдаймыз", - дейді ол.
Instagram-дағы бұл жарияланымды көру
Top Rank Boxing (@toprank) жарияланымы
WBO Шираз бен Әлімханұлы арасындағы келіссөзге 20 күн уақыт берді
Еске сала кетейік, орта салмақтағы қазақстандық экс-әлем чемпионының дисквалификация мерзімі қысқартылып, ол супер орта салмақтағы чемпиондық титулға ресми үміткер болып тағайындалған.
Бұдан бөлек, WBO Шираз бен Әлімханұлының командаларын жекпе-жек өткізу туралы келіссөз бастауға міндеттеді. Егер 20 күннен кейін жағдай өзгермесе, ұйым боксшылардың промоутерлік компаниялары арасында саудаласуды жариялайды.
"Қазір күте тұрамыз, не болатынын, келіссөздердің қалай жүретінін көреміз. Мүмкін олар келісер. Олай болмаса, әрі қарай не істейтінімізді көреміз. Біздің әлі уақытымыз бар", - деп толықтырды Берік Сұлтан.
Әлем чемпионы WBO ұйымына ауыр айып тақты
Еске сала кетейік, бұған дейін британдық чемпион Хамза Шираз Әлімханұлының дисквалификациясын алып тастап, оны міндетті үміткер етіп тағайындауды ұйым ішіндегі жемқорлықпен байланысты деп мәлімдеді.
Әлем чемпионы Жәнібек Әлімханұлына қатысты шешім үшін WBO-ны айыптады