Қазақстанда несиені кешіру кезіндегі салықты алып тастауы мүмкін: бұл кімдерге қатысты?
Қаржы нарығын реттеу және дамыту агенттігі Қазақстан қаржыгерлер қауымдастығымен бірлесіп, азаматтардың үмітсіз несиелерін, соның ішінде алаяқтық қарыздарын кешіру кезінде оларды жеке табыс салығынан (ЖТС) толық босатуды сақтап қалуды ұсынды, деп хабарлайды Tengrinews.kz премьер-министрдің ресми сайтына сілтеме жасап.
Тиісті мәселе премьер-министрдің орынбасары – ұлттық экономика министрі Серік Жұманғариннің төрағалығымен өткен Салық кодексін енгізу жөніндегі жобалық кеңсенің 25-ші отырысында талқыланды.
Қолданыстағы Салық кодексіне сәйкес, есептен шығарылған борыш сомасы қарыз алушының табысы ретінде танылады, бұл ЖТС төлеу міндетін туындатады. Бұл ретте салықтан босату 368-бап бойынша тек жекелеген жағдайларда ғана қарастырылған.
Серік Жұманғарин банктердің коммерциялық тәуекелдері мен қарыз алушылардың өмірлік қиын жағдайларын ажырату қажеттігін мәлімдеді. Бұл жерде адамға байланысты емес себептермен туындаған және оның несие төлеу мүмкіндігінен объективті түрде айырылған жағдайлары туралы сөз болып отыр.
"Алаяқтардың әрекетінен зардап шеккен азаматтар, сондай-ақ шын мәнінде өмірлік қиын жағдайға тап болған қарыз алушылар борыштарын кешіру кезінде ЖТС төлеуден толық босатылуы тиіс. Бұл мәселеде мемлекеттің ұстанымы айқын. Алайда егер банк өз балансын оңтайландыру және провизияларды тарату үшін коммерциялық несиені есептен шығарса, бюджет салық түсімдерінен автоматты түрде айырылмауы керек. Тәсіл теңгерімді болуы тиіс", - деп атап өтті Серік Жұманғарин.
Отырысқа қатысушылар банктерді сауықтыру және берешекті өндіріп алу процедураларын белсенді қолдануға ынталандырудың маңыздылығын атап өтті. Талқылау қорытындысы бойынша вице-премьер уәкілетті мемлекеттік органдарға Қаржы нарығын реттеу және дамыту агенттігімен бірлесіп, егжей-тегжейлі есептеулер жүргізуді, "өмірлік қиын жағдайдың" толық тізбесін (мүгедектік, еңбекке қабілеттілігінен айырылу, мүлкі мен табысының болмауы) заңнамалық тұрғыда бекітуді және келесі отырыста келісілген ұстанымды ұсынуды тапсырды.
Тағы оқыңыз: Несие және мұра: қарызға батып қалмау үшін нені білу маңызды?