Қазақстандық боксшылар Әлем чемпионатындағы жеңісі үшін 8 айдан кейін сыйақы алды
Бұған дейін әлеуметтік желілерде боксшылар Әлем чемпионатындағы медальдары үшін IBA-дан тиісті сыйақысын алмағаны туралы ақпарат тараған болатын.
Бүгінде спортшылар сыйақыны толық көлемде алғаны белгілі болды, ал жаттықтырушылар мен федерацияға төлем қыркүйектің ортасында түспек.
"Сыйақыны үш тарап алуы тиіс - олар боксшылар, жаттықтырушылар және федерация. Бүгінде боксшылар ақшаны алды, ал федерация мен жаттықтырушылар әлі алған жоқ. Бірақ IBA-дан 15 қыркүйекке дейін бұл қаражатты аударамыз деп жазылған хат келді", - деді ҚБФ атқарушы директоры Рауан Игенев тілшімізге берген сұхбатында.
IBA-дан келген хат/ Бокс федерациясы ұсынған
Қазақстандық боксшылар Әлем чемпионатындағы жеңісі үшін қанша алды?
Еске сала кетейік, бокстан Қазақстан құрамасы Дубайда өткен IBA Әлем чемпионатында алты медаль жеңіп алған болатын.
Анықтама: Дубайдағы (БАӘ) IBA нұсқасы бойынша бокстан Әлем чемпионаты 2025 жылдың желтоқсанында өтті.
Алтын медаль иегерлері: Сәкен Бибосынов (54 келі), Оразбек Асылқұлов (57 келі) және Абылайхан Жүсіпов (71 келі). Сабыржан Аққалықов (75 келі) күміс жүлдегер атанды.
Теміртас Жүсіпов (48 келі) пен Ертуған Зейнуллинов (63,5 келі) қола жүлдені иеленді.
Жеңімпаздарға 300 мың доллар (156,2 миллион теңге), күміс жүлдеге – 150 мың доллар (78,1 миллион теңге), қола жүлде иегерлеріне – 75 мың доллар (39 миллион теңге), ал ширек финалға шыққандарға – 10 мың доллар (5,2 миллион теңге) тағайындалған.
Осылайша, қазақстандықтар жалпы сомасы 1,24 миллион доллар (645,6 миллион теңге) көлемінде төлем алды.
Tengri Sport тілшісі әлем чемпиондарының бірі Абылайхан Жүсіповке хабарласып, ол сыйақы толық көлемде түскенін растады.
"Иә, бүгін төлем жасалғанын растаймын", - деді боксшы.
Еске сала кетейік, былтыр бокстан әлем чемпионаттарын екі халықаралық ұйым - IBA және World Boxing өткізген болатын.
Instagram-дағы бұл жарияланымды көру
Жарияланым авторы: ???????????????????????????????????? ???????????????????????????????????? (@jussupov_ablaikhan)
World Boxing Әлем чемпионатының медальдары үшін сыйақы төлемейді, мұны мемлекет өтейді. Ал Қазақстанда IBA аясындағы турнирлердің медалі үшін төлем қарастырылмаған. Туризм және спорт министрлігі деңгейінде спортшыларға тек World Boxing турнирлеріне қатысқаны үшін сыйақы төлеу туралы шешім қабылданған, өйткені осы ұйым Олимпиада ойындарына іріктеу өткізуге уәкілетті.
Тағы оқыңыз: “Арена менің жанкүйеріме толады“ - Әлімханұлы шеттетілгеннен кейінгі алғашқы ықтимал жекпе-жегі туралы