Бірінші ракетка атануға төрт ұпай қалды: Рыбакина Соболенкомен тартысқа қатысты пікір білдірді
Торонтодағы (Канада) WTA 1000 сериялы турнирінің 1/4 финалына шыққаннан кейін журналистер қазақстандық спортшыдан әлемнің үздік теннисшісімен арадағы бәсеке туралы сұрады.
Олардың арасындағы ұпай айырмашылығы осы аптаның соңында-ақ барынша азаюы мүмкін.
- Соболенко турнирден шығып қалды, егер сіз осы аптада Торонтодағы додада жеңіске жетсеңіз, рейтингте одан небәрі төрт ұпайға ғана қаласыз. Сіз бұған дейін ешқашан әлемнің бірінші ракеткасы болған емессіз және қазір осы жетістікке жақындап қалдыңыз. Бұл сізге осы аптада қосымша мотивация бере ме, әлде матч кезінде мұндай жайттар туралы ойламайсыз ба?
"Мен бұл туралы ойламауға тырысамын, өйткені алда әлі талай жарыстар бар. Матчте жеңіске жеткеніммен, шөптегі маусымды өзім қалағандай өткізе алмадым, сондықтан қазір мен үшін ең маңыздысы – ойынымды жақсарту. Осы жарысқа келгенге дейін кейінгі бірнеше аптада аянбай тер төктік. Меніңше, бұл турнирде кейбір дүниелер нәтиже беріп жатыр, бірақ бұл әлі де менің ең үздік ойыным емес. Сондықтан мен рейтинг пен жинаған ұпайлар туралы ойламауға тырысамын, жай ғана өз жұмысымды істеп, қаншалықты алысқа бара алатынымды байқаймын", - деп жауап берді Рыбакина.
Айта кетейік, Қазақстан өкілі бұған дейін әлемдік рейтингте ешқашан бірінші сатыға көтерілмеген. Ал Соболенко бірінші орынды 100 аптадан астам уақыт бойы сақтап келеді.
Rybakina - Samsonova post match press conference, R4 #Toronto pic.twitter.com/41TiNkVaV2
— rybafan (@rybafan) August 9, 2026
Рыбакина мен Соболенко: Текетірес тарихы
Қазақстан мен Беларусь өкілдері арасындағы шайқас кейінгі бірнеше жылда әйелдер турындағы ең принципті бәсекелердің біріне айналды. Рыбакина мен Соболенко кездескенде кортта тек екі түрлі ойын стилі ғана емес, екі түрлі темперамент түйіседі.
Көптеген жанкүйер олардың ойынын "Мұз бен жалынның шайқасы" деп атайды, себебі Арина матч кезінде эмоциясын ашық көрсетсе, Елена оны барынша жасыра біледі.
Өткен жылғы WTA қорытынды турнирінің финалында Соболенко Рыбакинаға қарата "Жылына бір рет таяқ та атады" дегендей мағынада сөз айтқан болатын. Бұл қазақстандық теннисшіге қосымша жігер беріп, ол матчте жеңіске жетті.
Соболенко - Рыбакина: Кездесулер тарихы
Әлемнің бірінші және екінші ракеткалары өзара 17 матч өткізіп үлгерді, әзірге басымдық Беларусь өкілінің жағында – 10:7.
Арина кейінг екі кездесуде – Индиан-Уэллстегі (АҚШ) турнирдің финалында және Майамидегі (АҚШ) жартылай финалда жеңіске жетті.
Дегенмен Рыбакина Үлкен дулыға турнирлеріндегі соңғы кездесуінде басым болған – қазақстандық теннисші Australian Open финалында мықты екенін дәлелдеді.
Рыбакина қашан әлемнің бірінші ракеткасы атануы мүмкін?
Айта кетейік, егер Елена Рыбакина Торонтодағы (Канада) турнирде жеңімпаз атанса, келесі жарыс алдында оның WTA рейтингінде Соболенкомен арасындағы айырмашылығы небәрі 4 ұпайды құрайды.
Егер ол келесі матчте Осакадан жеңіліп қалса, айырмашылық 789 ұпайға дейін ұлғайып, бәсекедегі жағдайын айтарлықтай қиындатады.
Келесі аптада қос теннисші де Цинциннатидегі турнирге қатысады деп жоспарланған. Онда Соболенкоға да, Рыбакинаға да былтырғы ұпайларын қорғауға тура келеді: Арина – 1/4 финал үшін, Елена – жартылай финал үшін.
Осылайша, Рыбакина Торонтода жеңіске жетсе, оған Цинциннатиде Соболенкодан бір кезең алда болу жеткілікті. Ал егер қазақстандық спортшы Торонто мен Цинциннатиді қатар жеңсе, әлемдік рейтингте көш бастайтынына кепілдік беріледі.
Келесі мүмкіндік тамыздың соңында US Open турнирінде болады. Онда Соболенко қазіргі чемпион ретінде өнер көрсетсе, Рыбакина былтырғы 1/8 финалдық нәтижесін қорғайды.
Instagram-дағы бұл жарияланымды көру
Арина Соболенконың (@arynasabalenka) жарияланымы
Рыбакинаның суперкамбэгі: Соболенкоға жетуге қанша ұпай қалды