Айыппұлдан қашпақ болып, жүк көліктерін тасжолда тастап кеткен жүргізушілер бірнеше есе артық төледі
Оқиға өткен аптаның соңында басталған. Петропавл қаласына кіреберістегі "Оңтүстік" полиция бекетінің маңындағы жол жиегінде жүк көліктерінің ұзын тізбегі пайда болған.
Қалада жүргізушілердің ереуілі туралы қауесет тарай бастады. Мән-жайды анықтау үшін оқиға орнына облыстық жолаушылар көлігі және автомобиль жолдары басқармасының басшысы Ерден Шортыбаев барды.
Кейін ол журналистерге жүк көліктерінің жиналуына жүргізушілердің көліктің салмақ параметрлерін бақылаудан жалтару әрекеті себеп болғанын айтты.
Қазір Солтүстік Қазақстан облысында "Жол қауіпсіздігі" іс-шарасы аясында рейдтер жүріп жатыр. Полиция мәліметінше, бұл шаралар, соның ішінде, автомобиль жолдарын сақтауға бағытталған.
"Оңтүстік бекетінде ауыр жүк көліктерінің рұқсат етілген салмақ параметрлерін сақтауына тексеру жүргізілді. Нәтижесінде Петропавлға кіреберісте салмағы нормадан асып кеткен 30-ға жуық автокөлік құралының тізбегі пайда болды. Егер артық жүк болмаса, жүргізуші салмақ бақылауынан еркін өтіп, жолын жалғастыра береді. Көліктер өлшеуден қашқан кезде, бұл өз-өзінен сұрақ тудырады. Бұл жағдайда артық жүкке байланысты жүргізушілер көліктерін тастап кеткен және бірнеше күннен бері жоқ", - деді Ерден Шортыбаев.
Анықтама: Жүк көліктерінің рұқсат етілген салмақ параметрлерінен асып кетуі үшін жауапкершілік Қазақстан Республикасының Әкімшілік құқық бұзушылық туралы кодексінің (ӘҚБтК) 571-бабымен реттеледі. Жеке кәсіпкерлер үшін 1 тоннадан 5 тоннаға дейінгі артық салмақ үшін айыппұл 40 АЕК (173 мың теңге), 5-тен 10 тоннаға дейін - 80 АЕК (346 мың теңге), ал 10 тоннадан асса - 120 АЕК (519 мың теңге) құрайды. Орта және ірі бизнес субъектілері үшін бұл сомалар әлдеқайда жоғары.
Ведомство басшысы мұндай артық жүктеменің кесірінен, әсіресе ыстық ауа райында асфальт-бетон жабынының жарамсыз болып қалатынын атап өтті. Дәл осы себепті аптап ыстықта осьтік жүктемеге маусымдық шектеулер енгізіледі.
Егер қалыпты жағдайда жалпы пайдаланымдағы жолдардың көпшілігі үшін 10 тоннаға дейінгі жүктемеге рұқсат етілсе, ауа температурасы 25 градустан асқанда асфальт-бетон жабынын қорғау үшін көлік құралдарының жекелеген санаттары үшін осьіне 8 тоннаға дейін қатаң шектеулер қолданылады.
"Біз жақында ғана орташа жөндеу жұмыстары аяқталған учаскені тексердік. Жол жиегінің қалай жаншылғаны қазірдің өзінде көрініп тұр. Олай болса, жолдарды сақтай алмаймыз. Біздің мамандар зақымданулар бойынша қажетті өлшеулерді жүргізіп қойды. Республикалық маңызы бар автомобиль жолына келтірілген материалдық шығынды өндіру үшін сотқа талап арыз жолдаймыз", - деп атап өтті Ерден Шортыбаев.
Түсініп, кешіріп, жібере салу керек пе?
Сонымен қатар жол жиегінде тұрған жүк көліктері басқа көліктердің қозғалысына кедергі келтірген, сондықтан жол қозғалысы қауіпсіздігін қамтамасыз ету үшін колонна маңында полиция департаментінің қызметкерлері, көліктік бақылау инспекциясы және СОБР жауынгерлері тәулік бойы кезекшілік ұйымдастырған.
"Біз әрбір жүргізушімен хабарластық. Кейбір жүргізушілер телефон арқылы көліктердің бәрі бірден бұзылып қалғанын айтып түсіндірді. "Сол себепті біз кетіп қалдық, қосалқы бөлшектерді және жұмыс берушілердің жауабын күтіп отырмыз" дейді. Осыдан кейін автокөлік иелері Петропавл аумағындағы дәмханалардың біріне жиналып, қала әкімшілігінің жеңілдік жасап, жауапкершілікке тартпауы үшін, осы жолы кешіріп, жібере салуы үшін не істеуге болатынын талқылаған", - деді сейсенбі күні облыс әкімдігінде өткен кеңесте СҚО полиция департаменті бастығының орынбасары Марат Жұмалиев.
Дегенмен, тасымалдаушылар тексеруден қашып құтыла алмады. Полиция мәліметінше, барлық көлік құралының иелері анықталып, өлшеуге жіберілді. Тексеру қорытындысы бойынша көліктік бақылау инспекциясы рұқсат етілген салмақ параметрлерінен асып кеткені үшін, ал полицейлер жол жабынын зақымдағаны және жол қозғалысы ережелерін бұзғаны үшін әкімшілік материалдар толтырды.
Анықтап, жазалау керек!
"Сомасы 14 миллион теңгеден асатын 93 әкімшілік құқықбұзушылық анықталды. Бұл оқиға тек салмақ пен габариттік бақылаудан жалтару әрекетін ғана емес, заңнама талаптарын ашық түрде елемеуді, мемлекеттік органдарға құрметсіздікті және тасымалдау процесіне қатысушылардың кейбірінің пайда табу үшін жол қозғалысы қауіпсіздігіне қатер төндіруге дайын екенін көрсетті", - деп мәлімдеді облыс әкімдігінде өткен кеңесте СҚО әкімінің бірінші орынбасары Марат Тасмағанбетов.
Жүк көліктері иелерінің біріне полиция қызметкеріне бағынбағаны үшін сот әкімшілік қамауға алу жазасын тағайындады.
"Петропавл қалалық әкімшілік құқықбұзушылықтар жөніндегі мамандандырылған соты бірнеше жүк көлігі иесінің полиция қызметкерінің оларды республикалық маңызы бар автожол жиегінен жылжыту туралы заңды талабын орындамағанын анықтады. Жүк көліктері Астана – Көкшетау автожолының 479–480-шақырымында (Петропавл қаласының әуежайына бұрылыс маңында) ұзақ уақыт тұрып қалған, соның салдарынан жол жабыны шөгіп қалған", - деп хабарлады облыстық соттың баспасөз қызметі.
Сотта ер адам кілттердің болмауы, жүргізушілермен байланыстың үзілуі және көліктердің бірінің бұзылуына байланысты автокөліктерді алып кете алмағанын алға тартты. Алайда сот бұл уәждерді негізсіз деп тапты. Соттың пікірінше, көліктің сақталуын қамтамасыз ету және қажет болған жағдайда оны жөндеуді ұйымдастыру тікелей иесінің міндеті.
"Сот жасалған құқықбұзушылықтың сипатын, іс мән-жайларын, сондай-ақ кінәлі тұлғаның бұған дейін ауыр салмақты көлік құралдарын пайдалануға қатысты ережелерді бірнеше рет бұзып, әкімшілік жауапкершілікке тартылғанын ескерді. Сот қаулысымен құқықбұзушы әкімшілік құқық бұзушылық жасағаны үшін кінәлі деп танылып, оған 10 тәулік мерзімге әкімшілік қамаққа алу жазасы тағайындалды", - деп түйіндеді сот өкілдері.
Фото Tengrinews.kz
"Сүттен ақ, судан таза" ешкім жоқ
Айта кетейік, облыстық әкімдікте өткен кеңесте Марат Тасмағанбетов салмақ нормаларын сақтау тек тасымалдаушылардың ғана емес, материалдарды тиеуді жүзеге асыратын мердігер ұйымдар мен карьер иелерінің де жауапкершілігі екенін баса айтты.
"Жолдар бұзылып жатыр, ал бюджет оларды қалпына келтіруге миллиардтаған шығын жұмсайды. Мұндай тәсілге жол беруге болмайды. Әркім жеке жауапкершілікті түсінуі тиіс", - деді Марат Тасмағанбетов.
Әкімнің бірінші орынбасары бұл жағдайда "сүттен ақ, судан таза" ешкім жоқ екенін атап өтті.
"Бүгінде, мысалы, әуежай арқылы өтетін айналма жолдардың бар екенін білмейді дейсіздер ме? Немесе осында отырған мердігер ұйымдар мен басшылардың бәрі "аппақ" деп ойлайсыздар ма? Тыйым салынған әрекеттерге "көмектесетін" қызметкерлер де бар. Заңнама талаптарын бұзғаны үшін жауапкершіліктен құтылмау принципі жұмысымыздың ажырамас факторы болуы тиіс", - деп қорытындылады Марат Тасмағанбетов.
Кеңес қорытындысы бойынша қосымша салмақ бақылау бекеттерін орнату және ауыр жүк көліктерінің салмақ нормаларын сақтауын бақылауды күшейту туралы шешім қабылданды.