Ақтөбеде Қазақстандағы ең ірі стадион салынып жатыр

Ақтөбеде Қазақстандағы ең ірі стадион салынып жатыр. Жаңа арена 35 мың көрерменге арналған, ол халықаралық матчтерді қабылдай алады және "Ақтөбе" футбол клубының жаңа алаңына айналады, деп хабарлайды Tengrinews.kz тілшісі.
Қазір болашақ аренаның орнында мұнаралы крандар, бетон конструкциялар мен жүздеген тонна арматура бой көтеріп тұр. Дегенмен бірнеше жылдан кейін мұнда ондаған мың жанкүйер мен халықаралық жарыстарды қабылдай алатын Қазақстандағы ең үлкен футбол стадионы пайда болады.
Жаңа спорт кешені қарқынды дамып келе жатқан "Алтын Орда" ауданында бой көтеріп жатыр. Аренаның өзінен бөлек, мұнда барлық қажетті инфрақұрылым да салынады.
Бүгінде құрылыс алаңында жұмыс тәулік бойы қызып жатыр. Мұнда 150-ге жуық адам еңбек етіп, 23 бірлік техника жұмылдырылған.

Биыл жыл соңына дейін құрылысшылар ғимараттың темірбетон қорабын толық көтеруді жоспарлап отыр, содан кейін негізгі қаңқаның металл конструкцияларын монтаждауға кіріседі.

Жаңа арена 35 мың көрерменге есептелген, бұл оны Қазақстандағы ең үлкен стадионға айналдырады. Салыстырмалы түрде алсақ, елордалық "Астана Арена" шамамен 30 мың адамды сыйдыра алады.

Құрылыс алаңы 25 гектарды, ал ғимараттың ауданы 88,5 мың шаршы метрді құрайды. Құрылыстың биіктігі 30 метрге жетеді, бұл – бес қабатты спорт кешені.

Құрылыс 2025 жылдың желтоқсанында басталды. Ең ауқымды кезеңдердің бірі алаңды дайындау болды.
Фото Tengrinews.kz
Екі айдың ішінде құрылысшылар 355 мың текше метр топырақты шығарып, қазаншұңқырды толық қазды. Қазіргі уақытта іргетас плитасын орнату жұмыстары жалғасып жатыр, ол үшін 27 мың текше метр бетон қажет болады.
Жаңа стадионның эскиздерін Ақтөбе облысының әкімдігі ұсынды
Жобаны Түркия мен Өзбекстанда заманауи спорт ареналарын салуда тәжірибесі бар түрік құрылыс компаниясы жүзеге асырып жатыр.

Жобаны УЕФА өкілдері зерттеп үлгерді, олар құрылыс алаңына барып, халықаралық талаптарға сай өз ұсыныстарын берген.

Стадионның басты архитектуралық ерекшелігі оның сопақша пішіні болмақ. Арена жартылай жабық болады, ал шатырдың ортасында қазақ мәдениетінің басты символдарының бірі - шаңырақ түріндегі үлкен ашық кеңістік жасалады.
Ішінде коммерциялық павильондар, кофейнялар, ойын аймақтары және басқа да қоғамдық орындар орналасады. Осының арқасында стадион тек футбол матчтері кезінде ғана емес, қала тұрғындары үшін жаңа орталыққа айналады.

Ақтөбе үшін жаңа арена салу қажеттілігі баяғыда туындаған.
Қазіргі Орталық стадион 1975 жылы ашылған болатын. Мұндағы алғашқы матчте алаң иелері мәскеулік ЦСКА-мен ойнап, кездесу 1:1 есебімен аяқталған.

Бастапқыда трибуналар 15 мың көрерменге арналған еді, бірақ реконструкциядан кейін және түрегеп тұру орындары жойылған соң сыйымдылық 12 800-ге дейін қысқарды.

Бүгінде "Ақтөбе" футбол клубының әрбір дерлік үй матчі лық толы трибуналарда өтеді.

Клубтың ақпараты бойынша, Қазақстан чемпионатының ойындарына билет сатып алуға 25 мыңға дейін жанкүйер ниет білдіреді, ал ең мәртебелі кездесулерге сұраныс 150 мың адамға жетеді. Ескіргеніне қарамастан, қазіргі стадион әлі де УЕФА талаптарына сай келеді және халықаралық матчтерді қабылдап жүр, алайда оның мүмкіндіктері әлдеқашан жеткіліксіз болып қалған.
Фото Tengrinews.kz
Егер құрылыс кестеге сай жүрсе, 2028 жылдың өзінде-ақ Ақтөбе тек жаңа футбол аренасына ғана емес, Қазақстандағы ең ірі стадионға - қаланың жаңа архитектуралық айшығына және өңірдің өсіп келе жатқан футбол амбицияларының символына айналатын заманауи спорт кешеніне ие болады.
Шымкенттегі стадионға 55 мың адам сыя ма? Әкімдік жауабы