Шетелдіктерді банк карталары үшін әкелген: Қазақстанда онлайн-казиноның жолы кесілді
Қазақстанда Nomad Poker ірі онлайн-казиносының қызметіне тосқауыл қойылды, деп хабарлайды Tengrinews.kz Қаржылық мониторинг агенттігіне сілтеме жасап.
Тергеу мәліметтері бойынша, Club GG Poker мобильді платформасы негізінде құрылған онлайн-казино қызметін Грузия аумағында жүрген Қазақстан азаматтары үйлестіріп отырған.
"Бұл схема ұйымдастырушыларды жасыруға, ақша ағындарын бақылауды қиындатуға және заңсыз қызметке қызмет көрсету үшін шетелдік азаматтардың атына ресімделген шоттар мен байланыс құралдарын пайдалануға мүмкіндік берді", - деп хабарлады ҚМА.
Заңсыз ойын платформасы тәулік бойы жұмыс істеп, ақшалай бәс тігу және ұтыстарды шығарып алу арқылы онлайн-покер форматындағы құмар ойындарға қатысуға мүмкіндік берген.
Жаңа қатысушыларды тарту үшін ұйымдастырушылар әлеуметтік желілерді, мессенджерлерді және жарнама құралдарын пайдаланған. Соның нәтижесінде онлайн-казино қызметіне 20 мыңнан астам пайдаланушы тартылған.
Шетелдіктерді Қазақстанға банк карталары үшін әкелген
Сондай-ақ тергеу барысында ұйымдастырушылардың қаржылық операцияларды жүргізу үшін банк шоттары ашылған "дропперлер" - тұлғалардың тармақталған желісін құрғаны анықталды.
Ол үшін күдіктілер шетелдік азаматтардың Қазақстанға келуін ұйымдастырған. 400 долларға дейінгі сыйақы үшін олардың атына банк карталары ресімделіп, мобильді банкинг қосылған.
ҚМА ақпаратына сәйкес, заңсыз схемада 60-тан астам дроп-шот пайдаланылған.
Пәтер, автокөліктер және 158 миллион теңге тәркіленді
Алдын ала мәліметтер бойынша, ойыншылардан түскен қаражат сомасы 7,5 миллиард теңге.
Соттың санкциясымен Алматыдағы пәтерге, үш автокөлікке, сондай-ақ дропперлердің банк шоттарындағы 158 миллион теңге көлеміндегі ақшалай қаражатқа тыйым салынды.
Сотқа дейінгі тергеу амалдары жалғасып жатыр.