Бұрынғы полицей сот орындаушысына шабуыл жасағаны үшін сотталып жатыр
Қостанайда жеке сот орындаушысына пышақпен шабуыл жасауға қатысты атышулы іс қарала бастады. Сот процесі алқабилердің қатысуымен өтіп жатыр, деп хабарлайды Tengrinews.kz тілшісі.
Сот орындаушысы Жансұлу Хамзинаға шабуыл жасағаны үшін сотталушылар орындығында бұрынғы полиция қызметкері отыр. Айыптау нұсқасы бойынша, ер адам көп жыл бойы алимент төлеуден жалтарып келген. Шабуыл жасалған кезде оның берешегі 9 миллион теңгеден асқан. Алимент туралы іс Хамзинаға түсіп, ол белсенді жұмыс істей бастаған, алдымен сотталушы 5 тәулік қамауға алынды, бірақ бұл оның қарызын өтеуіне түрткі болмады. Содан кейін сот орындаушысы қылмыстық жауапкершілікке тартылуы мүмкін екенін ескерткен, бұл борышкердің ашуына тисе керек, ол соңғы шараға баруды ұйғарған.
Іс материалдарына сәйкес, биыл 4 ақпанда кешке ол Жансұлу Хамзинаны аңдып тұрып, оның көлігіне отырған және әйелдің беті мен білегіне бірнеше рет пышақ салған.
"Сотталушы бұрын ішкі істер органдарында, атап айтқанда 2007 жылдан 2010 жылдың қарашасына дейін Арқалық ІІБ-де және 2011 жылдың маусымы мен қарашасы аралығында Қамысты ауданында жедел уәкіл болып жұмыс істеген. Ол қылмыстық істер бойынша дәлелдеу әдістемесі мен жедел-іздестіру іс-шараларын жүргізу тактикасы саласында арнайы білімі бола тұра, Рудныйдағы жалдамалы пәтерінен шығып, орналасқан жерін жасыру және жалған алиби жасау мақсатында екі ұялы телефонын әдейі қалдырып кеткен. Сотталушы қоқыс пакеті мен керамикалық жүзі бар ас үй пышағын алған. Көшеде ол қоқысты тастап, капюшонын киіп, негізгі бақылау камераларына түспейтін бағытты таңдаған", - деп сол күннің хронологиясын оқып берді прокурор Гүлмира Кенжетаева.
Мемлекеттік айыптаушының айтуынша, көліктің артқы орындығына отырған сотталушы Жансұлу Хамзинаға пышақпен соққы бере бастаған. Жәбірленуші беті мен мойнын қолымен жауып, белсенді қарсылық көрсеткен. Соның арқасында ол аман қалды, алайда беті мен білегінен тесіп-кесілген жарақаттар алды.
Арпалыс кезінде пышақтың керамикалық жүзі сынып, көлік салонында қалып қойған. Осыны пайдаланып, әйел көліктен қашып шығып, аман қалған, ал сотталушы айыптау нұсқасы бойынша пышақ сабын ғимараттың төбесіне лақтырып жіберіп, бой тасалаған.
"Жазадан құтылу мақсатында ол жалдамалы пәтеріне барып, қылмыс ізін жасыру үшін киімдерін ауыстырып, жууға қойған. Жақын арада ұсталуы мүмкін екенін түсініп, вахталық әдіспен жұмыс іздеуге белсене кіріскен. Ол өзінің кінәсін дәлелдеуді мүмкін емес ету үшін жүйелі шаралар қолданған", - деді сотта мемлекеттік айыптаушы.
Прокурордың айтуынша, сот орындаушысын тоқылған шәлі мен капюшоны құтқарып қалған, солардың арқасында мойын тұсын ажалды жарақаттардан қорғап қалу мүмкін болған. Сотталушының өзі кінәсін толықтай мойындамай отыр. Ол істі алқабилердің қатысуымен қарауды сұрады.
Қостанай облысында жеке сот орындаушыға шабуыл жасалды