“Көпшілік күтпеген“: Қазақстан құрамасының экс-бапкері норвегиялықтардың ӘЧ-дегі жетістігі туралы пікір білдірді
Норвегия құрамасы 1/8 финалда бразилиялықтарды қапы қалдырып, өз тарихында алғаш рет әлемнің үздік 8 командасы қатарына кірді. Черчесовтың айтуынша, норвегиялықтар нәтижеге барын салса, үлкен жетістіктерге жете алады.
"Турнир жаңа басталғанда Норвегия Әлем чемпионатының 1/4 финалында ойнайды деп ешкім ойламаған еді. Әлем біріншілігі барысында командалардың өз ырғағын таба бастағанын көріп отырмыз. Бірақ мен Норвегияны жақсы білемін, осыдан бірнеше жыл бұрын Қазақстан құрамасымен бірге оларға қарсы ойнағанбыз. Норвегиялықтар нәтижеге жұмыс істегенде не істей алатынын түсінемін. Осыдан бірнеше күн бұрын Норвегия Бразилияны жеңгеніне таңғалмайтынымды айтқан болатынмын. Міне, нәтиже де көп күттірмеді. Қазір ширек финалда көпшілік күтпеген командаларды көріп отырмыз", - деп келтіреді Черчесовтың сөзін Sport-Express.
Қазақстан құрамасы Холандты тоқтатқан еді
Еске сала кетейік, Станислав Черчесов Қазақстанда 2024 жылы Ұлттар лигасының бір циклінде жұмыс істеді. Алматыдағы норвегиялықтарға қарсы ойын оның жетекшілігімен өткен алғашқы матч болып, 0:0 есебімен аяқталған еді.
Эрлинг Холандтың Алматыға келуі жанкүйерлер арасында үлкен дүрбелең туғызды - көбі "Манчестер Сити" шабуылшысын стадион алдында бірнеше сағат бойы күткен болатын.
Матчке келетін болсақ, ойын алдындағы баспасөз мәслихатында Черчесов Холандқа қарсы "ерекше қару - АКМ-ді" қолданып көретінін айтқан. Кейін жаттықтырушы мұның Әліп/Қасым/Марочкин қорғаныс шебі екенін түсіндірді.
Айта кетейік, Черчесовтың Қазақстан құрамасындағы соңғы матчі норвегиялықтармен сырт алаңда өтіп, 5:0 есебімен ойсырай жеңілумен аяқталды. Сол матчте жұлдызды шабуылшы хет-трик жасаған болатын.
Холанд 2026 жылғы Әлем чемпионатында
2026 жылғы әлем біріншілігінде норвегиялық сұрмерген қазірдің өзінде 7 гол соғып, Мбаппе мен Мессиден (оларда 8 голдан) кейін бомбардирлер жарысында екінші орында тұр.
Норвегия құрамасы Холанд негізгі құрамда шыққан барлық матчте жеңіске жетті. Турнирдегі жалғыз жеңілісін (топтық кезеңде Франциядан) шабуылшы қосалқы құрам орындығынан тамашалаған болатын.
Instagram-дағы бұл жарияланымды көру
Herrelandslaget (@herrelandslaget) жарияланымдары
1/16 финалда норвегиялықтар Холандтың 86-минутта соққан голы арқасында Кот-д’Ивуар командасын (2:1) ұтса, 1/8 финалда бразилиялықтарды дәл осындай есеппен жеңді, шабуылшы бұл ойында дубль жасады.
Жартылай финал жолдамасы үшін Норвегия Англиямен кездеседі. Матч Қазақстан уақытымен 12 шілдеге қараған түні өтеді.
Килиан Мбаппе ӘЧ жартылай финалына шыққаннан кейін ерекше рекорд орнатты
Сәтбаев “Челсидегі“ алғашқы жаттығуын өткізді: фото жарияланды