“Қазір дағдарыс жоқ“: Ұлттық банк теңгені қолдау шарасын тоқтатады
Ұлттық банк төрағасы Тимур Сүлейменов квазимемлекеттік сектор субъектілерінің ішкі нарықта валюталық түсімнің 50 пайызын міндетті түрде сату талабын жою жоспарланғанын хабарлады, - деп хабарлайды Tengrinews.kz.
Бұл туралы ол цифрлық активтер индустриясын ынталандыру және дамыту мәселелеріне арналған брифинг барысында мәлімдеді. Ұлттық банк басшысының сөзінше, бұл валюта нарығындағы күшті ауытқулар кезеңінде енгізілген дағдарысқа қарсы шара болатын.
"Өздеріңізге мәлім, дағдарысқа қарсы шаралар аясында өткен жылы күшті ауытқулар болған кезде, біз квазимемлекеттік сектор субъектілеріне валюталық түсімнің 50 пайызын ішкі нарықта сатуды тапсырған болатынбыз", - деді Сүлейменов.
Ұлттық банк басшысы реттеуші Үкіметпен бірлесіп бұл шараны келесі аптада-ақ тоқтатуды жоспарлап отырғанын хабарлады.
"Бұл дағдарысқа қарсы әрекет ету шарасы болатын. Келесі аптада біз оны тоқтатуды жоспарлап отырмыз", - деп мәлімдеді Сүлейменов.
Оның айтуынша, валюталық түсімді міндетті түрде сату талабының жойылуы валюта нарығындағы сұраныс пен ұсыныс теңгеріміне айтарлықтай әсер етпеуі тиіс.
"Бұл сұраныс пен ұсыныс теңгеріміне түбегейлі әсер етпейді, өйткені бұл компаниялар кез келген жағдайда түсімдерінің бір бөлігін сатады: ел ішіндегі шығындарын олар теңгемен өтейді", - деп түсіндірді Ұлттық банк төрағасы.
Ол бұл шешімнің экономикадағы жағдайдың өзгеруіне байланысты екенін атап өтті.
"Неге бұны істеуді шештік? Өйткені бұл шара дағдарысқа қарсы құрал ретінде қолданылды. Қазір дағдарыс жоқ, теңге тұрақты, экономиканың жағдайы біршама қалыпты, төлем теңгерімі дұрыс. Сондықтан бұл шараны тоқтата тұруға болады", - деді Сүлейменов.
Сонымен қатар, Ұлттық банк басшысының сөзінше, мұндай құрал реттеушінің арсеналында қала береді.
"Ол әрқашан біздің арсеналымызда болады", - деп толықтырды ол.
Анықтама: Валюталық түсімді міндетті түрде сату - бұл шетел валютасында табыс табатын компаниялар сол валютаның бір бөлігін ішкі нарықта сатуы тиіс болатын шара. Бұл доллар ұсынысын арттырып, теңге бағамының күрт ауытқуын теңестіруге көмектеседі. Әдетте мұндай құрал валюта нарығында қысым күшейген кезде дағдарысқа қарсы шара ретінде қолданылады.
Мән-жайы
2024 жылғы қарашада Ұлттық банк квазимемлекеттік сектор субъектілері үшін валюталық түсімнің 50 пайызын міндетті түрде сату нормасы қайта басталғанын жариялады. Сол кезде реттеуші мұны шетел валютасына сұраныстың артуы аясында валюта нарығының теңгерімділігін арттыру қажеттілігімен түсіндірген болатын.