“Барыстың” капитаны мен танымал ойыншысы команда тізімінде жоқ: не болып жатыр?
Лига баспасөз қызметінің мәліметінше, 31 мамырда елордалық команда ойыншылары басым бөлігінің қолданыстағы келісімшарты аяқталған.
Бұған дейін "Барыс" бірнеше хоккейшімен жаңа келісімге қол қойғаны хабарланған болатын, алайда 2026 жылғы 1 маусымдағы жағдай бойынша көпшілігі келісімшартсыз қалды.
"31 мамырда ҚХЛ ойыншыларының 2025/2026 маусымын қоса алғанда жасаған келісімшарттарының мерзімі аяқталды. KHL.ru 2026 жылғы 1 маусымнан бастап шектеусіз еркін агент мәртебесіне ие болған хоккейшілер тізімін жариялайды", - делінген ҚХЛ сайтында.
1 маусымдағы жағдай бойынша "Барыстың" келісімшарты жоқ ойыншыларының тізімі:
Әлішер Аманғалиев;
Майкл Веккьоне;
Эмиль Галимов;
Роман Двуреченский;
Данил Дронов;
Жохар Дударкиев;
Нұрислам Зияш;
Алдияр Қабдуали;
Кәрім Қажыбеков;
Вячеслав Колесников;
Дәулет Қуат;
Иэн Маккошен;
Никита Мерзликин;
Мэйсон Морелли;
Александр Перкин;
Асанали Русланұлы;
Кирилл Савицкий;
Никита Ситников;
Роман Старченко;
Макс Уиллман;Әмірхан Шегебаев;
Артем Шестаков;
Мстислав Шипилин.
Команданың тағы бес ойыншысы шектеулі еркін агенттер тізіміне енді. Оларға 20 маусымға дейін жаңа келісімшарт ұсынылуы мүмкін.
Олар: Александр Макаров, Батырлан Мұратов, Максим Мұхаметов, Руслан Түсіпбеков және Адам Шил.
"Барыстың" капитаны мен атақты ойыншысы команда сапында емесАйта кетерлігі, 2025/2026 маусымында "Барыс" капитаны болған Кирилл Савицкиймен және Қазақстан құрамасы мен "Барыстың" атақты ойыншысы, клуб сапында ең көп матч өткізген рекордшы Роман Старченкомен келісімшарт әлі ұзартылған жоқ.
Біздің сауалымыздан кейін "Барыс" өкілдері келісімшарттарға қатысты мәлімдеме жасады, бірақ Старченко мен Савицкийге келісімшарт ұсынылатын-ұсынылмайтынын нақтыламады.
"31 мамырда қорғаушы Иэн Маккошеннің, сондай-ақ шабуылшылар Майкл Веккьоне, Эмиль Галимов, Мэйсон Морелли, Кирилл Савицкий, Роман Старченко және Макс Уиллманның келісімшарттары аяқталды. Қорғаушы Дмитрий Бреус жалдау мерзімі біткен соң Төменгі Новгородтың "Торпедосына" оралды.Сондай-ақ "Барыс" Адам Шил, Батырлан Мұратов және Максим Мұхаметовке квалификациялық ұсыныстар жасап, оларға деген құқықтарын бекітті. Келісімшарт мерзімі аяқталғаннан кейін "шектеусіз еркін агент" мәртебесінде жүрген кейбір ойыншылармен клуб келіссөздерді жалғастырып жатыр", - делінген мәлімдемеде.
Бұл ретте, былтыр дәл осындай тізімге Старченко мен Савицкий іліккен болатын, бірақ соңында олармен келісімшарт жасалған еді.
Instagram-дағы бұл жарияланымды көру
Kazakhstan Ice Hockey Federation (@kazakhstanhockey) жарияланымы
Жаңа маусымда "Барыс" сапында кімдер ойнайды?
Еске сала кетейік, бұған дейін "Барыс" легионерлер Джейк Масси, Райли Уолш және Тайс Томпсонмен келісімшартқа отырғанын жариялаған болатын.
Бұдан бөлек, Кирилл Ляпунов, Артём Королев, Бейбарыс Оразовпен екіжақты келісімшарттар жасалды, ал қақпашылар Андрей Шутов пен Никита Бояркиннің ұзақ мерзімді келісімшарттары бар.
Instagram-дағы бұл жарияланымды көру
"Барыс" хоккей клубының жарияланымы (@barys_official)
Айта кетейік, команданы өткен маусымдағыдай Михаил Кравец жаттықтырады. 2025/2026 маусымы команда үшін кейінгі үш жылдағы ең үздік маусым болғанымен, "Барыс" плей-офф кезеңіне шыға алмады.
Бұған дейін канадалық хоккейші Джейк Масси елордалық "Барыспен" жаңа келісімшартқа отырғаннан кейін қазақстандық жанкүйерлер туралы пікір білдірді