20 баллға жетсе, жүргізуші куәлігінен айырылады. Қазақстанда жаңа жүйе іске қосылды
Астана, Алматы және Шымкентте жол жүрісі қағидаларын бұзуды есепке алудың балдық жүйесі сынала бастады. Бұл туралы премьер-министр Олжас Бектенов айтты, деп хабарлайды Tengri Auto.
Бір жылда 20 балл - жүргізуші куәлігінен жарты жылға айырылады
Премьер-министр Олжас Бектенов жол жүрісі қағидаларын жүйелі түрде бұзумен күресу үшін Ішкі істер министрлігі Бас прокуратурамен бірлесіп балдық жүйе әзірлеп, ол Астана, Алматы және Шымкентте сынақтан өтіп жатқанын хабарлады.
"Құқықбұзушылықтың жүйелілігі бір күнтізбелік жыл ішінде 20 балл шегіне жетумен айқындалады. Осы шекке жеткен жағдайда көлік құралдарын басқару құқығы алты ай мерзімге тоқтатылады", – деп түсіндірді Бектенов депутаттық сауалға берген жауабында.
Балдар қаулы заңды күшіне енгеннен кейін ғана есептеледі. Бұл жүргізушілердің шешімге шағымдануға мүмкіндігі болатынын білдіреді.
Көлік жүргізу құқығынан алты айға айырылған соң, оны тек жол жүрісі қағидаларын білу бойынша емтиханды сәтті тапсырғаннан кейін қайтаруға болады.
Жаяу жүргіншілерге де 20 балл
Айта кетерлігі, мұндай механизм әлі жүргізуші куәлігі жоқ адамдар үшін де қарастырылған. Егер жаяу жүргінші немесе қозғалыстың өзге де қатысушысы 20 балл жинаса, оған жарты жыл бойы жүргізуші куәлігін алуға тыйым салынады.
"Балдық жүйені пилоттық енгізу қорытындысы бойынша жол жүрісі қағидаларын жүйелі бұзушыларға әсер ету шарасы ретінде психологиялық бағалауды енгізу мәселесі де қарастырылады", – деп толықтырды Олжас Бектенов.
Орташа жылдамдықты бақылайтын жаңа учаскелер
Олжас Бектенов орташа жылдамдық өлшенетін жолдардың жалпы ұзындығы қазіргі уақытта 2,1 мың шақырымға жуық екенін атап өтті. Алдағы уақытта жүйені тағы 1,5 мың шақырымға кеңейту жоспарланған.
"Жалпы ұзындығы 1,5 мың шақырымнан асатын тағы 8 жолда жүйені енгізу бойынша іске қосу-реттеу жұмыстары жүргізіліп жатыр. Олардың қатарында: "Қызылорда – Арал", "Қостанай – Троицк", "Ақтөбе – Орынбор", "Балқаш – Бұрылбайтал", Таразды айналып өту жолы, "Қостанай – Денисовка", "Шу – Бұрылбайтал", "Қандыағаш – Мақат" бар", – делінген үкімет басшысының жауабында.
Заңға бағынатын жүргізушілерге жеңілдік жасалмайды
Бұған дейін сенаторлар депутаттық сауалында тек айыппұлмен шектелу жеткіліксіз екенін айтып, заңға бағынатын жүргізушілерді ынталандыруды, мәселен, айыппұлға 50 пайыздық жеңілдік енгізуді ұсынған болатын.
Олардың пікірінше, қосымша ынталандыру қауіпсіз жүргізу мәдениетін қалыптастыруға көмектеседі.
Алайда Олжас Бектенов өз жауабында әлемдік тәжірибеде ынталандыру немесе жеңілдіктер құқықбұзушылық санын нақты азайтатынына ешқандай дәлел жоқ екенін айтты. Оның сөзінше, жол жүрісі қағидаларын сақтау ынталандыруға негіз емес.
"Жол жүрісі қағидаларын сақтау көлік құралы жүргізушісінің тікелей міндеті, бұл ынталандыру мен артықшылықтар алуға негіз емес. Тәртіпті жүргізушілер үшін қосымша ынталандыру шаралары қажет емес, себебі бұл айтарлықтай нәтиже бермейді", – делінген премьер-министрдің жауабында.
Сонымен бірге ол Қазақстанда сақтандыру жүйесі түріндегі экономикалық ынталандыру бұрыннан бар екенін еске салды. Тәртіпті жүргізушілер үшін сақтандыру құны төмендейді, ал ереже бұзатындар үшін, керісінше, айтарлықтай қымбаттай түседі.