Құрылыс салушы Мөлдір Сүйіншәлі ММА жұлдыздарына пәтер уәде еткен: не белгілі?
2024 жылы Tengri Sport-қа берген сұхбатында ММА файтері Әліби Ыдырыс "меценат қыздың" оған Астанадағы салынып жатқан тұрғын үй кешенінен пәтер беруге шешім қабылдағанын айтқан болатын.
Сол кезде пәтер тек уәде етілген болатын, бірақ әлі берілмеген еді.
"Біз Мөлдірмен менің чемпиондық белбеуімді қайырымдылыққа берген кезімде таныстық. Сол кезде ол белбеуді 22 миллион теңгеге сатып алған еді. Кейін әлеуметтік желілер арқылы сөйлестік, ол біздің спортты қолдайтынын айтты. Ол Мұхаммед Эминовпен өткен жекпе-жекті көріп, Нұрбек Қабдрахмановқа пәтер сыйлауды ұйғарды. Ол ММА-ның үлкен еңбек екенін, ал біз мұндай жекпе-жектер үшін аз ғана ақша алатынымызды түсінді. Мен қатты қуандым, өйткені бауырым бұдан да артыққа лайық. Кейін ол маған да Астанадан пәтер сыйлады. Бұл үй қазір салынып жатыр. Мен онда тұрмаймын, тіпті кілтін де алған жоқпын", - деген еді Әліби 2024 жылы.
Спортшының айтуынша, сұхбаттан бері екі жылға жуық уақыт өтсе де, ол пәтерді алмақ түгілі, сыйлықтан мүлдем бас тартқан.
"Ол Астанадан пәтер беретінін айтқан. Кейін бір мәселелер туындады. Содан соң өзім оған: "Көңіл бөлгеніңізге рақмет, бірақ маған пәтер керек емес. Пәтерге ақшаны өзім тапқым келеді" деп жаздым. Осымен бәрі бітті", - деді Әліби тілшімізге берген жауабында.
Айта кетейік, Сүйіншәлінің қазақстандық ММА файтерлеріне "сыйлық" жасауы жиі болатын жайт еді.
Оның Naiza лигасының чемпионы Нұрбек Әбдірахмановқа, сондай-ақ Фаниль Рафиковқа пәтер беретінін жариялағаны белгілі. Фаниль Рафиковқа тіпті сегізбұрыш ішінде пәтер кілті табысталған болатын.
Instagram-дағы бұл жарияланымды көру
NAIZA (@naiza.mma) жариялаған пост
Осы видеоның астында бір жылдан бері пәтерлердің әлі берілмегені туралы пікірлер тұр.
"Моля бұл үйлерді әлі соғып бітпеді. Біз, 60-қа жуық адам, әлі де үйімізді күтіп жүрміз. Құрылыс тоқтап тұр, қос сауда жүріп жатыр, алғашқы сатып алушыларға ақша қайтарылмады. Міне осылай, Instagram-да "бәрі керемет", ал шын мәнінде қарапайым халық баспанасыз жүр", - деп жазды пікір қалдырушы.
Біз Naiza лигасының басшысы Нұрбек Қарабаладан жағдайға қатысты пікір сұрадық, алайда ол нақты жауап бермеді.
- Мөлдір Сүйіншәлі мен Naiza лигасының қандай байланысы бар? Ол Қазақстандағы ММА-ның дамуына қаржы салды ма?
"Аралас жекпе-жек саласында бизнес әрқашан үлкен қиындықтармен байланысты. Кез келген промоутердің негізгі күнделікті жұмыстарының бірі - турнирлерді ұйымдастыру үшін серіктестер мен демеушілер тарту", - деп жауап берді ол.
- Спортшылар Фаниль Рафиков, Әліби Ыдырыс, Нұрбек Қабдрахманов және басқалары Мөлдір Сүйіншәлі уәде еткен пәтерлерді алды ма?
"Біздің іс-шараларымыздың бірінде Мөлдір Сүйіншәлі демеуші ретінде қатысты. Өз тарапынан ол әлеуметтік бастамаларға да атсалысып, атап айтқанда, файтерлерге пәтерлер табыстады. Менің білуімше, бірқатар спортшымен тиісті келісімшарттар жасалған. Жеке өзімде ол туралы ниеті түзу адам ретінде жақсы әсер қалды. Сонымен қатар қазіргі жағдайды ескере отырып, тергеудің ресми нәтижелерін және оқиғаға берілетін құқықтық бағаны күту маңызды деп есептеймін. Барлық мән-жай объективті түрде анықталып, жағдай заң аясында шешіледі деп үміттенемін", - деді лига президенті тілшімізге берген сұхбатында.
Мөлдір Сүйіншәлі не үшін ұсталды?
Тергеу анықтағандай, 2021–2024 жылдары күдікті өзіне бағынышты компаниялар арқылы Nura Elite жобасына ақша жинаған. Жоба бойынша 37 коттедж бен 24 таунхаус салынуы тиіс болған. Жұмысты 2023 жылдың соңына дейін аяқтауға уәде бергенімен, нысандар бітпеген - тек ғимараттардың қаңқасы ғана тұрғызылған.
"Нәтижесінде 56 адам жәбірленуші ретінде танылып, тартылған қаражаттың жалпы сомасы 3,9 миллиард теңгені құраған. Оның ішінде 322 миллион теңге Мөлдір Сүйіншәлі, жұбайының және анасының есепшоттарына аударылған, сондай-ақ 145 миллион теңге қолма-қол ақшаға айналдырылған", - делінген ҚМА хабарында.
Бүгін, 28 сәуірде оның ұсталғаны және үй қамағына алынғаны белгілі болды.