ერთი თვე გავიდა უკრაინაზე რუსეთის თავდასხმიდან
დღეს, 24 მარტს ერთი თვე შესრულდა უკრაინაში ომის დაწყებიდან. ერთი თვეა რუსული არმია უკრაინის ქალაქებსა და სოფლებში ბომბავს არა მხოლოდ სამხედრო სამიზნეებს არამედ საცხოვრებელ სახლებს, საავადმყოფოებს, სასწავლო და კულტურულ დაწესებულებებს.
2022 წლის 24 თებერვალს, პრეზიდენტ პუტინის განკარგულებით, რუსულმა არმიამ უკრაინის წინააღმდეგ დაიწყო „სპეციალური სამხედრო ოპერაცია“, რომლის მიზნად პუტინმა გამოაცხადა უკრაინის „დემილიტარიზაცია და დენაციფიკაცია“.
გაეროს მონაცემებით, უკრაინაში დაღუპულია 1000-მდე მშვიდობიანი მოქალაქე, თუმცა, როგორც ადამიანის უფლებათა უმაღლესი კომისრის ოფისში აცხადებენ, მსხვერპლი გაცილებით დიდია. ვერ ხერხდება ინფორმაციით მიღება ისეთი რაიონებიდან, სადაც აქტიური საბრძოლო მოქმედებები მიმდინარეობს. უკრაინის ხელისუფლების თანახმად, მხოლოდ ქალაქ მარიუპოლში დაღუპულია 2300-ზე მეტი მშვიდობიანი მოქალაქე. უკრაინის სახალხო დამცველის ინფორმაციით, ომმა უკვე იმსხვერპლა 121 ბავშვის სიცოცხლე.
გაეროს მონაცემებით, ომის გამო ლტოლვილად იქცა 3.6 მილიონი უკრაინელი. კიდევ რამდენიმე მილიონია უკრაინის შიგნით იძულებით გადაადგილებულთა რიცხვი.
პრეზიდენტმა ვოლოდიმირ ზელენსკიმ მსოფლიოს სახელმწიფოებს და მათ მოქალაქეებს უკრაინის მხარდაჭერისთვის მადლობა კიდევ ერთხელ გადაუხადა და მოუწოდა, 24 მარტს ისევ გამოვიდნენ აქციებზე. გვიან ღამით გამოქვეყნებულ ვიდეომიმართვაში ზელენსკი ამბობს, რომ 24 მარტს ბრიუსელში იმართება სამი მნიშვნელოვანი სამიტი - ნატოს, ევროკავშირის და „დიდი შვიდეულის“ ლიდერთა სამიტები და მათგან სერიოზულ ნაბიჯებს ელოდებიან.