კოლექტიური უსაფრთხოების ხელშეკრულების ორგანიზაცია და შანხაის თანამშრომლობის ორგანიზაცია ავღანეთის ვითარებას განიხილავენ
რუსეთის პრეზიდენტმა, ვლადიმირ პუტინმა, ყაზახეთის პრეზიდენტთან, ყასიმ-ჟომართ თოყაევთან შეხვედრის გახსნისას 21 აგვისტოს, განაცხადა, რომ კოლექტიური უსაფრთხოების ხელშეკრულების ორგანიზაცია ამ კვირაში ჩაატარებს ვიდეოკონფერენციას და განიხილავს ვითარებას ავღანეთში ხელისუფლებაში თალიბანის დაბრუნების შემდეგ.
„რა თქმა უნდა, უსაფრთხოების საკითხი ერთ-ერთ ყველაზე აქტუალურ საკითხს წარმოადგენს ახლა, განსაკუთრებით იმ მოვლენების ფონზე, რომელთაც ახლა აქვთ ადგილი ავღანეთში“, - განაცხადა პუტინმა და დასძინა, რომ 23 აგვისტოს კოლექტიური უსაფრთხოების ხელშეკრულების ორგანიზაციის შეკრება შესაძლებლობა იქნება ლიდერებისთვის, ერთმანეთს შეადარონ თავიანთი მოსაზრებები.
დუშანბეს კონფერენციის კულუარებში, რომელიც ეძღვნება შანხაის თანამშრომლობის ორგანიზაციის მე-20 წლისთავს, და რომელშიც, სხვა ქვეყნებთან ერთად, ჩინეთი, პაკისტანი, ინდოეთი და ცენტრალური აზიის ოთხი ქვეყანა შედის - შანხაის თანამშრომლობის ორგანიზაციის ყოფილმა გენერალურმა მდივანმა, რაშიდ ალიმოვმა, ტასს განუცხადა, რომ თალიბანის მიერ ხელისუფლების ხელში ჩაგდების შედეგები მეტ მოქმედებას მოითხოვს სტაბილურობის უზრუნველსაყოფად.
„ავღანეთში ტერორისტული ორგანიზაციების მზარდი აქტივობა და რეგიონული სტაბილურობის პოტენციური საფრთხეები ქმნის შანხაის თანამშრომლობის ორგანიზაციის გაეროსა და კოლექტიური უსაფრთხოების ხელშეკრულების ორგანიზაციასთან თანამშრომლობის ახალ დონემდე აყვანის საჭიროებას“, - განაცხადა ალიმოვმა.