გიორგი გახარია: სამწუხაროდ ჩვენ ჯერ კიდევ გვყავს ქუჩის ოპოზიცია
ოპოზიციური პარტიების მოქმედებებს აფასებს და უკმაყოფილოა მათი ორგანიზებული საპროტესტო გამოსვლებით. „ჩემს პერსონალურ აზრს მოგახსენებთ, ჩვენი პასუხისმგებლობა იყო ის, რომ ჩვენ ყველაფრისთვის უნდა ვყოფილიყავით მზად. სამწუხაროდ, და მე აქ არ ვგულისხმობ ყველას, სამწუხაროდ ჩვენ ჯერ კიდევ გვყავს ქუჩის ოპოზიცია და ეს ქუჩური, ოპოზიციური მოძრაობის სტერეოტიპებიდან ვერ გამოვედით, ეს არის უკიდურესად სამწუხარო", - თქვა საქართველოს პრემიერ-მინისტრმა გიორგი გახარიამ ტელეკომპანია „იმედთან“ ინტერვიუში.
პრემიერის აზრით, რაც უფრო მეტი კრიზისი იქნება უკეთესია ოპოზიციისთვის, რაც უფრო მეტი ვირუსის გავრცელება იქნება უკეთესია ოპოზიციისთვის, რაც უფრო მეტი პრობლემები იქნება სხვადასხვა სახელმწიფო სისტემებში პოლიცია იქნება ეს, სამედიცინო სიტემა იქნება, ჯარი იქნება - უკეთესია ოპოზიციისთვის.
„ეს ჩვენი დემოკრატიული კულტურის ერთ-ერთი ყველაზე მძიმე ადგილია და მძიმე გამოწვევა. ეს, რაც ახლა ხდება ესეც უნდა გავიაროთ. ჩვენმა მოქალაქეებმა ესეც უნდა დაინახონ, ესეც ჩვენი მოსახდელია, როდესაც გლობალური პანდემიის პირობებში, გლობალური ეკონომიკური კრიზისის პირობებში, როდესაც ასეთი გამოწვევებია ჩვენი მოქალაქეების ჯანმრთელობის, იმის მაგივრად, რომ ჩვენ გავერთიანდეთ ჩვენ ახლა უბრალოდ ვუყურებთ ელემენტარულ დესტრუქციულ, პროვოკაციულ ქმედებებს, რომლის მიზანიც ნათელია და ზედაპირზეა. რაც უფრო მეტი კრიზისი იქნება უკეთესია ოპოზიციისთვის, რაც უფრო მეტი ვირუსის გავრცელება იქნება უკეთესია ოპოზიციისთვის, რაც უფრო მეტი პრობლემები იქნება სხვადასხვა სახელმწიფო სისტემებში პოლიცია იქნება ეს, სამედიცინო სიტემა იქნება, ჯარი იქნება - უკეთესია ოპოზიციისთვის“, - თქვა გიორგი გახარიამ.
როგორც მთავრობის მეთაური ამბობს, არავის მისცემს იმის უფლებას, რომ საკუთარი ვიწრო პოლიტიკური ინტერესებიდან, ხელისუფლების ჟინიდან გამომდინარე ქვეყანა დაანგრიოს.
„საბოლოო ჯამში დაზიანებული სახელმწიფო და დაზიანებული სახელმწიფო ინსტიტუტები, რატომღაც კრიზისში მყოფი დღეს ემთხვევა ოპოზიციის ინტერესებს და ამას ეს ხალხი არ მალავს. ჩვენ ვამბობთ და კიდევ ერთხელ გავიმეორებთ, ეს არის ჩვენთვის წითელი ხაზი, წითელი ხაზი არის იქ, სადაც გადის საქართველოს მოქალაქის ჯანმრთელობა, საქართველოს სახელმწიფო ინსტიტუტების მდგრადობა და სიძლიერე, ჩვენ არავის არ მივცემთ იმის უფლებას, რომ საკუთარი ვიწრო პოლიტიკური ინტერესებიდან, ხელისუფლების ჟინიდან გამომდინარე ქვეყანა ვინმემ დაანგრიოს. მე მინდა ყველას მივცე 100%-იანი გარანტია, რომ ამის საშუალებას არ მივცემთ არავის და ამის საშუალებას ჩვენც არ მოგვცემს ქართველი ხალხი და ამომრჩეველი, რომელმაც ასეთი ბრძნული არჩევანი გააკეთა“, - აღნიშნა პრემიერ-მინისტრმა.
ოპოზიციურმა პოლიტიკურმა პარტიებმა - ვინც, ცესკო-ს მონაცემებით, გადალახა ან ვერ გადალახა 1%-იანი საარჩევნო ზღვარი - ხელი მოაწერეს ერთობლივ განცხადებას, რომლითაც 31 ოქტომბრის საპარლამენტო არჩევნები არალეგიტიმურად გამოაცხადეს. პოლიტიკური პარტიები უარს ამბობენ საპარლამენტო მანდატებზე.
ოპოზიცია 8 ნოემბერს რუსთაველის გამზირზე გეგმავს საპროტესტო აქციას.