ხელი მოეწერა წინასაარჩევნოდ, საჯარო სამსახურში დასაქმებულთა ცნობიერების ამაღლების მემორანდუმს
ცენტრალური საარჩევნო კომისიის თავმჯდომარემ, ევროპის საბჭოს საქართველოს ოფისის ხელმძღვანელის მოადგილემ, იუსტიციის მინისტრის მოადგილემ, თავისუფალი და სამართლიანი არჩევნებისთვის უწყებათაშორისი კომისიის ხელმძღვანელმა და საჯარო სამსახურის ბიუროს უფროსმა, ურთიერთთანამშრომლობის მემორანდუმს მოაწერეს ხელი.
მემორანდუმის მიზანია 2020 წლის 31 ოქტომბრის არჩევნებისთვის, საარჩევნო პროცესში ადმინისტრაციული რესურსებისა და თანამდებობრივი ან სამსახურებრივი მდგომარეობის არამართლზომიერად გამოყენების, ასევე, წინასაარჩევნო კამპანიის წარმოებისა და მასში მონაწილეობის წესების დარღვევის პრევენციის უზრუნველსაყოფად, ხელი შეეწყოს საჯარო დაწესებულებებში დასაქმებული პირების ცნობიერების ამაღლებას. მემორანდუმი ითვალისწინებს ადმინისტრაციული რესურსის არამართლზომიერად გამოყენების პრევენციისათვის შექმნილი დისტანციური სასწავლო კურსის განხორციელების ხელშეწყობას.
სასწავლო კურსი განკუთვნილია საჯარო მოსამსახურეებისთვის, აღმასრულებელი ხელისუფლების ყველა დონეზე:
„მემორანდუმი ეხება ვებ-პლატფორმას, იმ სასწავლო კურსს, რომელიც გახლავთ ადმინისტრაციული რესურსების გამოყენების პრევენციის და კამპანიის წესების შესახებ. ამ კურსის გათვითცნობიერებით, საჯარო მოსამსახურეები მიიღებენ იმ ცოდნას, გამოცდილებასა და პრაქტიკულ რეკომენდაციებს, რომელიც საჭიროა იმისთვის, რომ ქვეყანაში ჩატარდეს სამართლიანი და სანდო არჩევნები“,- აღნიშნა ცენტრალური საარჩევნო კომისიის თავმჯდომარემ თამარ ჟვანიამ.
საპარლამენტო არჩევნები საქართველოში 31 ოქტომბერს გაიმართება.