ოკუპირებულ აფხაზეთში კორონავირუსის 30 ახალი შემთხვევაა
აფხაზეთის დე ფაქტო მთავრობის მიერ შექმნილმა ოპერატიულმა შტაბმა კორონავირუსით კიდევ 30 ადამიანის ინფიცირება დაადასტურა.
16 სექტემბრის საღამოს მონაცემებით, აფხაზეთში აღრიცხული აქვთ კორონავირუსის სულ 756 შემთხვევა. მათგან გამოჯანმრთელებულია 198. COVID-19-ით გარდაცვლილია 7 ადამიანი.
შტაბის ინფორმაციით, გუდაუთის საავადმყოფოში მძიმე მდგომარეობაშია 6 პაციენტი.
ოკუპირებულ რეგიონში ინფიცირების შემთხვევებმა მკვეთრად მოიმატა აგვისტოს დასაწყისიდან, მას შემდეგ, რაც დე ფაქტო ხელისუფლებამ რუსეთთან ე.წ. საზღვარი გახსნა და ტურისტების მიღება დაიწყო.
აფხაზეთში კორონავირუსის პირველი შემთხვევა მაისში დაადასტურეს. მაისიდან ივლისის ბოლომდე აღრიცხული ჰქონდათ 81 შემთხვევა. 31 ივლისიდან 16 სექტემბრის ჩათვლით კი, უკვე 675. დაუზუსტებელი მონაცემებით, აფხაზეთში 244 ათასამდე ადამიანი ცხოვრობს.