ვიეტნამში კორონავირუსის ახალ ტალღას მოელიან
პრემიერ-მინისტრმა ნგუენ სუან ფუკმა განაცხადა, რომ ინფექციის ამჟამინდელი ტალღა განსხვავდება მეორე ტალღისგან, რომლის წინააღმდეგ ბრძოლაც მოუწია ვიეტნამს მარტში. სახელმწიფო ტელევიზიის ცნობით, საფრთხის წინაშეა ვიეტნამის ყოველი პროვინცია და ქალაქი.
ცენტრალიზებული საკარანტინო პროგრამისა და კონტაქტების დადგენის აგრესიული სისტემის წყალობით ვიეტნამმა მოახერხა ინფიცირების შემთხვევათა 450-მდე შენარჩუნება მიუხედავად იმისა, რომ ის ჩინეთს ესაზღვრება.
95-მილიონიანი ვიეტნამი ყველაზე დიდი მოსახლეობის მქონეა იმ ქვეყნებს შორის, სადაც ჯერ არ ყოფილა COVID-19-ით სიკვდილის შემთხვევა. თვეების განმავლობაში არ აღრიცხულა არც ინფექციის შიდა გავრცელება.
ამ ვითარებას საფრთხე შეექმნა მას შემდეგ, რაც გასულ კვირაში ინფექციამ იჩინა თავი ცენტრალური ვიეტნამის ქალაქ დანანგში, სადაც ათიათასობით ვიეტნამელი ატარებს არდადეგებს.
სამშაბათს მთავრობამ 15 დღით შეაჩერა დანანგთან ყოველგვარი საჰაერო მიმოსვლა. როგორც როიტერსი იტყობინება, ქალაქსა და მის გარშემო ინფიცირების მინიმუმ 30 შემთხვევა გამოვლინდა.
ვიეტნამის ხელისუფლების თანახმად, ამჟამად გამოვლენილი ვირუსის შტამი უფრო გადამდებია, ვიდრე მეორე ტალღის ვირუსი.