მსოფლიოში COVID-19-ით ინფიცირებულთა რაოდენობამ 3 მილიონს გადააჭარბა
საქართველოში კორონავირუსით ინფიცირებულთა რაოდენობა 500-ს უახლოვდება. გამოჯანმრთელებულია 149 პაციენტი. ახალ ინფიცირებულ პაციენტებს შორის ერთი თეთრიწყაროს მერიის თანამშრომელია. თეთრიწყარო უკვე მეორე დღეა იმ მუნიციპალიტეტებს შეუერთდა, სადაც ვირუსის გავრცელების გამო მკაცრი კარანტინი ამოქმედდა.
ქვეყნის მასშტაბით კი აკრძალვების ნაწილი გუშინ მოიხსნა. უკვე შესაძლებელია ავტომობილებით გადაადგილება და გაიხსნა ღია ტიპის ბაზრებიც, თუმცა არა ყველგან. მაგალითად, თელავის აგრარულ ბაზარს რამდენიმესაათიანი მუშაობის შემდეგ, ისევ დაკეტვა მოსთხოვეს. მიზეზად დასახელდა საქართველოს ჯანდაცვის სამინისტროს მიერ დაწესებული ნორმების დარღვევა. სურსათის ეროვნულმა სააგენტომ ბაზრის ადმინისტრაცია 3 ათასი ლარით დააჯარიმა.
აკრძალვების ნაწილის გაუქმების ფონზე დაავადებათა კონტროლისა და საზოგადოებრივი ჯანმრთელობის ცენტრის ხელმძღვანელი ამირან გამყრელიძე მოსახლეობას შეახსენებს, რომ შთაბეჭდილება არავის უნდა დარჩეს, თითქოს ვირუსი საქართველომ უკვე დაამარცხა. მისი თქმით, ადამიანებმა COVID-19-თან ერთად ცხოვრება უნდა ისწავლონ.
მსოფლიოში კი კორონავირუსის რეგისტრირებულმა შემთხვევებმა ერთ თვეში თითქმის მილიონით იმატა და უკვე 3 მილიონს გადააჭარბა.
ინფიცირებულთა რაოდენობის მიხედვით კვლავ უცვლელია პირველი სამეული – აშშ-ში უკვე თითქმის მილიონი ადამიანი დაავადდა, ესპანეთში – 236 ათასზე მეტი, იტალიაში კი 197 ათასზე მეტი.
გარდაცვალების მიხედვითაც პირველი სამეულიც უცვლელია – აშშ (55,4 ათასი), ესპანეთი (23,5 ათასი) და იტალია (26,6 ათასი).
წყარო: radiotavisupleba.ge