24 საათში 491 პირი დააჯარიმეს საგანგებო მდგომარეობის რეჟიმის დარღვევისთვის
შსს-ს თანამშრომლებმა, 2 აპრილის 21 საათიდან 3 აპრილის დილის 6 საათამდე, ე.წ. კომენდანტის საათის დარღვევის ფაქტზე, მთელი ქვეყნის მასშტაბით, 189 მოქალაქე დააჯარიმეს.
გარდა ამისა, პოლიციამ საჯარო სივრცეში 3-ზე მეტი პირის შეკრების და 2-მეტრიანი სოციალური დისტანციის დაუცველობის გამო 19 მოქალაქე დააჯარიმა.
1 იურიდიული პირი დაჯარიმდა ეკონომიკურ საქმიანობასთან დაკავშირებული შეზღუდვების დარღვევის ფაქტზე.
2 პირი დაჯარიმდა თვითიზოლაციის წესების დარღვევისთვის.
გადაადგილების წესის დარღვევის ფაქტზე კი 280 პირი დააჯარიმეს.
შსს-ს შეახსენებს საზოგადოებას, რომ საგანგებო მდგომარეობის რეჟიმის დარღვევა იწვევს ადმინისტრაციულ პასუხისმგებლობას - ფიზიკური პირის დაჯარიმებას 3 000 ლარით, ხოლო იურიდიული პირის - 15 000 ლარით.
შინაგან საქმეთა სამინისტრო კვლავ მოუწოდებს მოქალაქეებს, დაიცვან საგანგებო მდგომარეობით დაწესებული შეზღუდვები, წინააღმდეგ შემთხვევაში, გამოყენებული იქნება კანონით გათვალისწინებული, შესაბამისი ზომები.
კორონავირუსის პრევენციის მიზნით საქართველოში 31 მარტიდან კომენდანტის საათი მოქმედებს. ეს იმას ნიშნავს, რომ 21:00 საათიდან დილის 06:00 საათამდე მოქალაქეებს სახლიდან გასვლა ეკრძალებათ.