პრეზიდენტი და მისი თანამშრომლები ხელფასის ნაწილს კორონავირუსთან ბრძოლის ფონდში გადარიცხავენ
„ეს არის ჩვენი მოქალაქეობრივი პასუხისმგებლობა და ამ ურთულესი გამოწვევის დაძლევაში ყველა ერთად უნდა ვიყოთ“, - აღნიშნულია პრეზიდენტის ადმინისტრაციის მიერ გავრცელებულ ინფორმაციაში.
„ქართული ოცნების“ წარმომადგენლების მიერ ხელფასის ნაწილის კორონავირუსის წინააღმდეგ ბრძოლის ფონდში გადარიცხვის სოლიდარობის აქცია 2 აპრილს დაიწყო. როგორც „ქართული ოცნების“ აღმასრულებელმა მდივანმა, ირაკლი კობახიძემ საგანგებო ბრიფინგზე განაცხადა, საქართველოს პარლამენტის უმრავლესობისა და მთავრობის წევრები კორონავირუსთან ბრძოლის ფონდში სამი თვის განმავლობაში ხელფასის მესამედს გადარიცხავენ.
ირაკლი კობახიძის თქმით, საუბარი იყო 105 ადამიანზე, მთავრობისა და საპარლამენტო უმრავლესობის წევრებზე.
ირაკლი კობახიძემ გამოხატა რწმენა, რომ სოლიდარობის აქციაში „ქართული ოცნების“ ასეულობით წევრი და მხარდამჭერი ჩაერთვებოდა.