ძიუდოისტი ტატო გრიგალაშვილი გრან სლემის ჩემპიონი გახდა
დიუსელდორფში მიმდინარე ძიუდოს პრესტიჟულ საერთაშორისო ტურნირზე - გრან სლემზე დღევანდელი პროგრამა საქართველოს ჰიმნით დასრულდა. 20 წლის ძიუდოისტმა ტატო გრიგალაშვილმა 81 კილოგრამი წონითი კატეგორიის ფინალში, მოქმედი ოლიმპიური ჩემპიონი, რუსეთის ნაკრების წევრი ხასან ხალმურზაევი დაამარცხა და ჩემპიონი გახდა.
ფინალამდე ტატო გრიგალაშვილმა ხუთ მეტოქეს აჯობა. მათ შორის მსოფლიოს 2015 და 2017 წლების ჩემპიონებს: იაპონელ ტაკენორი ნაგასესა და გერმანელ ალექსანდრ ვიჩერზაკს.
დიუსელდორფის სამდღიანი გრან სლემი გუშინ დაიწყო. მამაკაცთა შორის, შვიდი წონითი კატეგორიიდან ოთხში უკვე შეივსო საპრიზო სამეულები. საქართველოს ნაკრების თოთხმეტკაციანი შემადგენლობიდან კი რვამ იჭიდავა და მათგან ორი კვარცხლბეკზეც ავიდა. ქართული გუნდის მონაგარი გრიგალაშვილის ოქრო და ვაჟა მარგველაშვილის (66 კგ) ვერცხლია.
ხვალ მედლები 90, 100 და +100 კილოგრამებში გათამაშდება და ქართველთაგან კონკურენციაში ჩაებმებიან ლაშა ბექაური, ბექა ღვინიაშვილი (ორივე 90 კგ), გიორგი ჩიქოვანი, ნიაზ დიასამიძე (100, კგ), გურამ თუშიშვილი და ონისე ბუღაძე (+100 კგ).